今個星期得隻《SIDEWINDERV》有啲睇頭，街價約$320左右，至於風頭躉《WE7》就回到$370左右。暑假未完，Game廠已部署9月攻勢，如《高達：相逢在宇宙》、《天外魔境》同《GTA3》日本版等。隻《高達：相逢在宇宙》限定版連日本都封盤冇得訂，睇怕冇一千銀都唔使旨意入手。查實今集預訂會送第一集嘅1.5ver版再加SS版GUNDAM系列，分分鐘重值錢過隻主遊戲，有乜法子唔炒？好彩今日開始嘅「大中華遊戲嘉年華」可率先試玩，地點係鑽石山荷里活廣場。
文：打機鐵人
前排一路傳GC停產嘅消息，令到唔少老任Fans都怕GC步N64後塵，但係睇番暑假GC遊戲，真係唔失禮，好似《FFCC》、《ViewtifulJoe》同《星之卡比》等，有口碑有銷量。再打落月尾有NAMCO嘅《TOS》，似乎大廠亦繼續支持老任，加上主機連GBPlayer都唔使1,400蚊，愛嚟玩《BH》系列都抵番晒。