買相機嘅準則有好多，一心學影相嘅人會投資單鏡反光機，只為求有相睇ForFun嘅人，梗係平平哋買部儍瓜機「玩」啦！買數碼相機嘅心態亦一樣，只為求拍吓生活照、隨街玩吓SnapShot，喂售貨員哥哥！你介紹部6、7千蚊嘅數碼相機過我作死麼！今日小記精選咗腦場內幾部好抵玩嘅Cam仔，全部都係幾百蚊有交易，最正係全部一機幾味，又影相又拍Video，學生哥都負擔得起。
記者：朱崇德
攝影：林栢鈞
Model：Racso、阿P(Space2)
鳴謝：加勒比海Cafe
SPEEDGD400可謂近來場來少見平、靚、正三寶！睇樣揸上手，真係好難估到佢係港產機，唔講都唔知！SPEEDGD400係少有能打入日本秋葉原嘅港產機，需知日本出名多攝影大廠，所以一啲質素稍差嘅CAM，真係完全冇市場兼唔入口！證明呢部GD400用料特別足！
感光元件使用1/2吋200萬像素CMOS，最高有效像素可以使用內置程式插值至400萬像素(2,304×1,728)，就算用嚟Print製4R相片，都應付有餘！不過最大膽創新嘅，都係佢個日期顯示功能，真係好似菲林儍瓜機一樣，「啤」死落張數碼相上，雖然用電腦做都好簡單，但就係多了一份心思。其他實用式拍攝功能還包括有±2.0EV曝光（0.5EV微調），同4種白光平衡設定等，只可惜鏡頭使用了定焦設計，再另加4倍數碼變焦，否則會更完美。
拍攝動態片段都係GD400強項，可以無間斷拍攝動態影像（即係場內人俗稱嘅影爆卡），而格式使用電腦最廣泛對應嘅AVI-MotionJPEG，解析度為320×240像素（每秒15格），而且完全有聲、有畫好實用，以機身內置嘅16MB記憶體作計算，大概可以拍下200秒動態影像，嫌唔夠喉佢重有條外置SD卡插槽（兼容MMC），隨時要擴充記憶體都冇問題。
測試時覺得最過癮嘅，係用USB接線駁上電腦時，電腦能直接辨認出相機，並設定為SD卡閱讀器（PC及Mac兼容），對於唔熟電腦嘅人的確減省咗好多軟件安裝上之麻煩。最後考慮嘅問題，當然係價錢啦！日本秋葉原大概做緊港幣$1,400左右，但香港嘅中文介面版，就$888搞掂，以呢個價錢嚟講，真係好難搵多部有咁齊功能嘅CAM。
Profile
感光元件：1/2吋CMOS200萬像素(最大400萬像素插值)
數碼變焦：4倍
記憶卡：SD、MMC卡(內置16MB記憶體)
顯示屏：1.6吋
尺寸：93×56×38mm
$840
ANA電腦 查詢電話：27700137
睇賣相呢部VIVITAR3625有啲土裏土氣，個推蓋式設計，真係好似某「O」牌機種，但唔講唔知，原來佢係今日介紹三部機之中，感光元件唯一使用上1/3.2吋CCD嘅CAM，解析度同為210萬像素，在成像表現上非常滑淨，絕對最啱用嚟玩SnapShot。鏡頭使用5.6mm定焦鏡，不過一樣有微距拍攝功能。曝光方面有非常實用嘅±1.8曝光補償功能，可以令拍攝操控更富彈性，另一項非常好嘅設計，就係「影像清晰度」三級制調校，平時拍攝就用「Normal」、影人像時用「Soft」好有沙龍Feel、拍環境照時用Hard，影像夠晒實淨清晰！其他功能還包括「有畫冇聲」嘅動態影像拍攝（320×240），UserFriendly嘅全中文操控介面等，機身內置有8MB記憶體，一定唔夠用，相信要買多張SD記憶卡。
Profile
感光元件：1/3.2吋CCD210萬像素
記憶卡：SD（內置8MB記憶體）
顯示屏：1.6吋
尺寸：105×55×44mm
$950
FINEUP 查詢電話：23611295
呢部MaxellMaxCam-ProMega，都係香港自行開發嘅機種，齋睇樣，真係有幾分似某「S」大牌子數碼相機嘅加肥版，非常搞鬼！感光元件都係使用CMOS，解析度為200萬像素（1,600×1,200），最高可插值至300萬像素，都算係幾夠用！一樣有動態影像拍攝功能解析度係一樣嘅320×240（10fps）不過就沒有聲音，都算係畀大家過吓手癮，外置記憶體插槽，係使用現時最廣泛人用嘅CompactFlash，最高可支援到256MB，須知現時CF卡係市面上數一數二嘅平卡，唔係太講牌子，$200左右就買到張128MB，真係影到你唔影！其他自動曝光、白平衡、防紅眼閃光燈等，都係基本儍瓜機應有功能，算係唔錯兼夠用。
Profile
感光元件：CMOS200萬像素(最大300萬像素插值)
數碼變焦：4倍
記憶卡：CompactFlash
顯示屏：1.5"
尺寸：98×59×47mm
$850
SUNNY電腦 查詢電話：27089219
