近期，香港經濟漸見復甦，連帶本地車市亦興旺起來。唔止咁呀，香港車迷重好有福氣可先賭為快，事關即將於9月上旬德國法蘭克福車展上，才正式面世嘅全新第5代寶馬5系，由今日起（8月22日）至周日（8月24日），將在香港灣仔會展Hall1C展出，車迷可以一次過睇晒全線寶馬新5系㖭！至於話新、舊款5系有甚麼變動地方？不如大家響睇車前，一齊嚟大檢閱啦！
記者：陳偉林 攝影：伍慶泉
ImageGirl：KendyfromCoolFactory
車輛提供：寶馬香港（27145271）
唔講唔知，新、舊兩款車響尺碼上，原來第5代新車較前擴闊不少，主要集中於車廂空間，令兩排乘客有更寬敞，尤其頭部空間，會有更闊落嘅體驗。由於呢個緣故，新車看來會較上一代大了不少，加上取材自新7系嘅弧形Bi-Xenon大燈配搭，給人炯炯有神之餘，夜間佢重可以因應軚盤轉向調校角度，既安全又見魅力，而一脈相承嘅多盞式LED尾燈配搭，輪廓勾劃起來更見霸氣，好有一份透徹吸引力。
座艙空間見寬敞外，前後兩排皮椅剪裁亦見妥貼舒適，而前排除備有全方位電控外，廠方重新增有電控腿墊伸縮，形式跟高性能M3或M5跑車相若，以提供更佳嘅腿部承托，唔怕長途車有容易疲倦嘅問題。再者，頂級版重附加有前排頸枕，係源於7系嘅設計，既舒適重加有保護力㖭！講到設備方面，不可不提一套屬經改良第2代i-Drive裝置，經過一輪測試後，發覺簡化模式更易於操控，指間更可以操控多媒體影音、冷氣、電子導航及免提電話等裝備，還有一套八個不可或缺嘅SmartAirbags安全氣袋連充氣簾幕㗎！
對比之下，感覺舊版5系賣相來得較為斯文，而新款無論造型、線條，均予人獨特、時尚而又帶出一派優越感。再者，兩套高級皮椅同樣給人愜意舒適，惟新車重加有伸縮腿墊同護頸墊，教人倍見體貼細心呢！
