啤酒專家T與餐廳羅傾啤酒，左丁山好少飲酒，得個聽字。專家T話英國人站在酒吧，可以一口氣飲八杯啤酒，面不改容，但我哋唐人就多數唔掂。餐廳羅有一個解釋，就係中國文化注重煲滾水沖茶，世世代代都係飲茶長大嘅，唔慣飲啤酒，外國人係飲凍水大嘅，好細個就學會飲酒，世世代代之後，就變成飲酒當飲水。呢種情況，已成為遺傳，唔可以短時間內改變。啤酒其實同水差唔多。專家T話：「一罐、一樽啤酒，百分之九十五成份係水，百分之五係大麥酒同其他材料。我夠膽講，香港人之中，百分之九十五分辨唔到唔同牌子嘅分別，隻隻啤酒其實差唔多味道，我哋賣啤酒唔係賣味道，係賣牌子，賣形象（image），所以廣告宣傳係最重要嘅，啤酒廠最大嘅成本亦係宣傳廣告公關費。」
餐廳羅曾經與一位飲咗三十年嘅啤酒常客拗過乜牌子最好飲，人客堅持H牌與C牌最好，無此不歡。餐廳羅知道拗極都冇用，於是叫人將幾隻唔同牌子啤酒倒落唔同嘅玻璃杯，分abcde，拎去送畀啤酒常客飲，叫佢試吓分辨邊隻係H牌，邊隻係C牌，騎騎，常客搞錯晒，根本分唔出，問佢邊隻最好飲，佢只能答：「隻隻差唔多。」專家T話：「我喺英國學師之時，做過無數tasting（試飲），只有極端少數酒客知道唔同牌子嘅分別，只不過你一貼張牌子招紙上去，人人都話H牌好飲！」