黃又南形容自己的童年很「烚」，只記得小時因受哮喘所困而令他不時入院吸氧氣，反而十六歲時被陳果賞識獲邀拍片，拍了一場斬手戲竟淚流不止，回家後還要攬着姊姊抱頭痛哭，令他至今難以忘懷。
男子組合Shine的黃又南，家有雙親及一姊，他日前在柴灣接受訪問時稱自己小時候「烚吓烚吓」，故他對童年的感覺很模糊，而他最有印象的便是經常受哮喘困擾。
又南說：「嗰時自己有哮喘，但又好鍾意打籃球，我可以打六、七個鐘都唔停，但自己又黑又瘦，打完波重要飲凍嘢，明知氣管唔得都唔理，所以咪成日哮喘發作，要入醫院吸氧氣。」
還有一個令又南覺得童年模糊的原因，就是他的家人不停搬屋，他說：「我印象中，喺十二、三歲之前都係不斷搬屋，每半年就搬一次，我屋企人好鍾意搬嚟搬去，以前自己就覺得好得意，𠵱家就唔鍾意咯。」
又南表示他從小已很有自己的想法，尤其當他踏入青少年時期，陳果導演的出現，更令他改變一生。他在十六歲那年，獲陳果賞識邀拍處男片《香港有個荷里活》，他在片中飾演一個典型的時下青年，玩ＩＣＱ追女仔兼貪威識食，但最後收場卻是自斬手臂。
他說：「拍呢部戲好深刻，第一次拍斬手戲就喊得出，點知睇片時覺得唔夠感動，第二次補拍就輕佻咗，喊唔出，到第三次拍啦，我將所有嘢發洩出嚟，係咁喊，停咗機重趴喺地下喊，到返屋企時，我又攬住家姐喊，家姐都唔知乜事，而嗰次亦係我人生中第一次攬住家姐喊。」
又南覺得自己已青春無悔，他說：「我試過拍電影同出CD，去過頒獎禮，又去過威尼斯參加影展，人生有咁嘅經歷已經開心啦，我覺得自己好好運啦。」
採訪：朱芷瑩
