喺嚟緊九月舉行嘅法蘭克福車展上，來自世界各地嘅車廠，都會展出旗下最新款或快將推出嘅新車；其中來自德國嘅福士，繼早前宣布會展出新一代Golf車系之後，到日前又公布會展出經過改動嘅Polo車系，相信勢必惹來全場車迷注目呢！
當中最吸引嘅，相信會係將於今年秋季推出嘅Polo四門房車版，雖然車首造型保留有原車神髓，但由於改用上四門房車設計嘅關係，故此車長會較原有掀背型號多出280mm，從而令後排乘客可擁有更多乘坐空間外，就連尾廂容積亦增至432公升，擺放多件行李亦見方便容易。而引擎配搭方面則會與現有掀背型號相近，馬力輸出為77匹及104匹，用以驅動此車可謂綽綽有餘。
若然你覺得四門房車版Polo唔啱你，而平時又鍾意駕車到郊外玩的話，咁呢部PoloFun就一定合你意喇！事關外形雖與現有型號相近，但當細心留意下，定能察覺到新車用上全新頭泵把、電鍍車頂行李架及17吋跑車合金胎軨組合，造型望落份外吸引突出；與此同時，懸掛系統亦被升高20mm，匹配四輪215/40ZR17輪胎組合，更適合行走野外路段嘅需要呢！車廂布局亦經過改動，當中包括用上跑車桶椅等等，務求令車廂洋溢着一份跑車氣息。