睇開意大利波嘅球迷一定對費倫天拿有感情，咁就啱嘞，因為費倫今屆無端端由丙組升咗上乙組，不過佢哋升班得嚟就好兒戲，反映意大利足球制度亂過亂世佳人。
原來上屆意乙球隊卡坦尼亞投訴意乙冠軍錫耶納用啲唔合法嘅球員上陣，搞到一比一打和波，而卡坦尼亞最後就排尾四要降班，所以就上訴到底。
呢件事隨時搞到意甲都一身蟻，足總於是落槌話上屆其中三支降班隊卡坦尼亞、熱拿亞同沙蘭力坦拿留班，至於另一要降班嘅科森察因冇財政保證，所以要降落丙組，於是財政狀況較佳嘅意丙球隊費倫可升班，不過意乙就因為咁變成二十四隊。意足總咁驚人嘅決定就好似細路仔玩泥沙，確係幾悲。
世界足球先生及歐洲足球先生嘅韋亞，生涯中最精采嘅時間，都算係喺AC米蘭嗰陣。最近佢十六歲嘅仔仔，亦步老爸後塵，同AC米蘭簽約做職業球員，情況令我求大俠諗起荷蘭球王告魯夫父子跟巴塞隆拿嘅關係。希望小韋亞唔好搞到似祖迪告魯夫咁，踢極都踢唔起啦！
前晚一輪國際賽，原本就好多心水清嘅球迷，睇死多數會和氣收場，下盤亦會較旺。結果好幾場真係擺明和局格嘅賽事，真係開下盤，不過就和唔到，作客嗰隊WIN埋！呢啲作客冷Ｗ分頭重好過博和局，下次如果又嚟呢啲國際友賽練兵場合，唔好咁死牛一邊頸淨係博和嘞！
繼文迪達被流放外借到米杜士堡後，拉素繼續「瘦身」行動，免費放走阿根廷新星卡斯杜文，返去祖國沙士菲搵食。原來○一年佢哋喺沙士菲簽入卡斯杜文，轉會費到𠵱家只係畀咗一半多啲，重未找清！呢次沙士菲真係錢又有人又有，多謝都嚟唔切囉！
羅馬尼亞都係前晚國際友賽贏波，射手梅度獨建兩功贏烏克蘭二比○。梅度賽後話呢場波佢咁神勇，係因為要畀啲顏色佢班車路士隊友睇！咁又係嘅，𠵱家車仔隨時再簽埋基斯普，加埋上個禮拜射死利物浦嘅哈索賓基，重有古莊臣、杜夫等，冇表現肯定難爭正選！