代理成日爭住開記者會，好多時都係啲碎料，為免悶親記者，就出盡法寶搞氣氛。美聯噚日準備咗個百寶箱，同一個分別寫住「內地資金滾入」及「香港樓市上升」嘅天秤，重搵嚟新界區頭布少明扮魔術師，將個空空嘅百寶箱轉一轉，就變咗幾十個朱古力金幣出嚟，又請嚟九倉黃光耀一齊將金幣放入「內地資金滾入」嗰邊，咁「香港樓市上升」嗰邊就即刻彈起嘞。
搞咗咁耐，原來要回應近日多咗內地人嚟香港買樓嘅話題。美聯為九倉深井碧堤半島，喺深圳分行設展銷廳，向內地人推介，首十名買呢個盤嘅內地人，美聯會送出一萬蚊連卡佛禮券。優惠期至下月底。
黃光耀話，內地人嚟港買樓，最好買一手樓，因為明碼實價。佢估計，內地人買樓料會佔整體百分之五至十。
近年發展商促銷住宅會送好多優惠畀買家，𠵱家連商場都有優惠。信和粉嶺帝庭軒商場，租戶可以獲得價值八萬蚊嘅免費裝修，同產品展示架，啱晒創業人士。
信和集團租務部助理總經理黃日山講，免費裝修優惠包括安裝冷氣、電表、電燈、粉飾牆身同地板，同埋提供度身設計嘅產品展示架。佢透露，若果租客需要特別嘅裝修同家具，佢哋可以彈性處理。
帝庭軒落成兩年，商場總樓面共十萬方呎，已租出九成，平均呎租十五至三十蚊。出租舖位面積由三百八十至二千零六十方呎。
商場每日人流超過四萬人次，周末同公眾假期有近六萬。此外，四至六月期間，沙頭角直通巴士每月載客量升幅逾一成。相信呢啲數據，對有興趣承租嘅客戶應該會有參考作用。
影壇大哥大成龍有份發展嘅大埔龍成堡，𠵱家參觀示範單位，重可以免費睇成龍最近上映嘅「飛龍再生」。
美聯喺嚟緊兩個周末共四日，向每位參觀者送兩張門票，送完即止。蘭西諗，假如發展商喺現樓播放呢套戲，效果會唔會好啲呢？
龍成堡共有七十七個單位，分別有獨立屋、半獨立屋、複式同分層設計，面積九百九十八至四千七百零二方呎。聽美聯講，一樓連平台花園單位銷情最好，𠵱家只剩得四間。買家以教師最多，其餘有中港商人、外籍人士同近期市場最關注嘅內地客。
假期去睇樓早已成為港人生活一部份，近年發展商重送禮品或茶點招待，簡直係又食又拎。不過，𠵱家去酒店都一樣有嘢送。
長江實業喺北角嘅北角海逸酒店，今個月底前去睇示範單位，可以獲贈一百蚊嘅酒店餐飲券。若果睇完之後租住，可以攞到更多優惠。
北角海逸酒店房間面積由三百九十一至八百四十二方呎，月租七千九百九十九蚊起，酒店重提供七、十四同二十一晚嘅短租服務。
蘭西
電郵地址：
