呢邊廂本田Accord3.0頂級版，靜悄悄地將車價調低至29萬9千，令銷情轉好重穩步上揚㖭！有見及此，豐田代理亦不甘示弱，亞Mark聽聞佢哋重搵嚟較Accord更高層次嘅凌志ES300，炮製出一款特別版，以同樣29萬9千開賣。今鋪凌志ES300都可謂紆尊降貴喇！事關原有型號賣開要成接近36萬，而且重不乏捧場客支持，但為求保證豐田一哥位置，加上昔日Accord嘅業績一直力壓豐田Camry，為要爭呢口氣，看來豐田方面不僅埋身緊逼，重誓要打壓對手㖭！然而，身為局外人嘅買家就着數喇！事關呢部凌志ES300特別版，既有可調校角度嘅放射式頭燈，又有雨滴感應水撥、合金胎軨，還有原廠恒溫冷氣、高級6碟CD音響連7個喇叭，加上主動式VSC、TRC等電子系統，以及ABS連EBD，重有BA輔助煞車裝置，有齊咁豪華同安全裝備嘅行政座駕，以唔到30萬車價開售，自然號召力大增啦！