金城武喺電影《向左走．向右走》中飾演懷才不遇嘅小提琴家，為咗唔想俾人覺得佢有姿勢冇實際，金城武專登喺開拍前去台灣拜師學藝。
由於金城武識彈結他，再加埋佢嘅音樂天份，練咗短短三日，金城武已經掌握到基本技巧，拉起小提琴上嚟有板有眼。不過估唔到金城武愈拉愈上癮，佢嫌喺電影裏面拉小提琴唔夠喉，重索性自己演奏埋電影中嘅配樂，真係唔到你唔服！
唔單止係金城武，連女主角梁詠琪（GiGi）亦為今次部戲學新嘢，不過梁詠琪學嘅係波蘭文。GiGi為咗配合飾演嘅小說及詩集繙譯員角色，專登走去學波蘭文朗誦波蘭詩句。由於GiGi朗誦時似模似樣，如果唔係GiGi自己講番出嚟，工作人員真係唔知佢原來只係學咗三個鐘頭咋！
陳小春早排喺台灣西門町舉行新碟預購簽名會，重好型咁揸電單車出場，小春綵排嗰陣攞咗台灣同事個公仔頭盔嚟戴扮可愛。小春除咗又唱又跳外，重同歌迷玩遊戲，勝出者除咗有禮物外，重可以向小春提出一個要求，結果個男歌迷要求小春擁抱一吓佢女朋友，小春梗係樂意啦！
吳君如早排去咗淮河水災災區探訪，佢見到當地啲人咁慘，返香港之後就周圍叫老友捐錢，因為只要一萬蚊港紙，就可以喺嗰邊起一間屋。君如當然最先向佢男友陳可辛同埋老友杜汶澤埋手，君如話災區嘅居民要二十年先儲到一萬蚊，真係唔知幾時先儲得到！
商天娥成八、九年冇返無綫拍劇，噚日佢為無綫新劇《隔世追兇》試造型，原來佢今次飾演郭晉安嘅阿媽，連郭晉安都覺得有啲怪，不過娥姐就話：「佢（郭晉安）話我係佢偶像，我咪做佢阿媽囉，冇所謂啦，好多阿媽級都好後生，好似林青霞咁，其實我喺佢隔籬似佢家姐多啲。」
譚詠麟（阿倫）同李克勤最近去拉斯維加斯同加拿大舉行「左麟右李」巡迴演唱，佢哋噚日一齊接受港台節目嘅電話訪問。問阿倫同克勤，究竟外地嘅歌迷會唔會好似香港fans咁，派利是畀佢哋？阿倫話：「又冇派利是喎，但係就有人摺咗啲銀紙牌。」
汪禹早前涉嫌以提款卡呃阿婆錢，佢聲稱話張提款卡之前已經唔見咗，重報埋失㖭，佢懷疑係有人用佢張卡去呃人錢。汪禹噚日十二點左右去尖沙嘴警署報到，搞咗半個鐘後，警方畀佢轉擔保，同通知佢下月十號再去報到，到時就會知撤銷控罪定係正式起訴佢。
