藝人第二代在娛樂圈發展都會有很大壓力，吳嘉龍（Carl）也有着同樣的感覺，他返港僅一年，很多人都只會稱他為「吳耀漢個仔」，吳嘉龍決心靠自己的努力在電影圈闖一番事業，要其他人以後直呼他的名字。
吳嘉龍於英國生活了多年，一年前返港探望姊姊後決定留港發展，他說：「我同自己講，畀啲時間留喺香港試吓，其間有model公司搵我做嘢，其實我唔介意做model，因為始終都要搵錢，如果有一日我嘅老闆──即係我間銀行戶口，同我講我已經冇晒錢，咁我就會走啦。」
對於父親吳耀漢，吳嘉龍對他讚不絕口，但亦帶來不少壓力，他說：「我爹哋做喜劇真係好好，我試過同佢一齊出街，啲人見到佢都會笑得好開心。有人問過我想唔想拍喜劇，但我知道一定會有人將我同爹哋比較，如果我要擺脫『吳耀漢個仔』呢個名，就一定要做一啲同佢唔同嘅嘢。」
吳耀漢觀賞吳嘉龍演出的電影《黑白森林》後亦有讚他，吳嘉龍笑說：「以前我做戲佢只會講『Stupid』，但睇完呢套戲之後，佢居然第一次同我講『Good』。」
吳嘉龍外形不俗，但他對於自己的混血兒身份感到頗無奈，他說：「其實我都唔知我係中國人定英國人，我只知我係一個混血兒，加上我中文又唔好，喺英國做戲時，有個導演話我係中國人，所以冇角色啱我。」
吳嘉龍亦十分介意別人稱他為「鬼佬」，他說：「我覺得咁叫係好冇禮貌，我喺英國做戲時個工作人員同我講『鬼佬，你去換衫啦』，之後我同佢講我其實未死㗎。」
採訪：李珮洳
攝影：林德雄
髮型：Kurt（Tony&Guy）
