近排小初手風都算順，幾乎炒乜都有進帳，但難免亦有失手之時，成為憾事。
話說小初上個月，聽到經紀黃話順龍（361）大老闆以每股1.25元，減持3000萬股，股份落入有心人手上，應該有得諗。隻股自從大老闆減持後，一條氣湧過上去1.61元，小初由於略為猶豫，在1.55元水平才跟入，點知就一路坐到𠵱家。
聽聞有心人接咗手貨之後，其實係想炒高乘勢推畀芬佬，雖然一眾本地證券行落力推介，但成交仍然稀疏，小初雖然經常見佢哋左搓右搓，但股價就唔上唔落，噚日升1仙，收1.48元，成交只得31萬元，在如此升市中，咁嘅表現確係令人失望。小初計過數後，把心一橫，決定輸小小沽貨離場。
另外，上咗市個零月嘅東瑞製藥（2348），上市前雖然出現過唔少不利傳聞，但最終安然上市，而股價亦一直企喺0.80元招股價樓上，公司將於下周五公布上市以來首個中期業績，根據傳統智慧，新股業績表現通常唔差，可以短炒一轉。
慕容小初