超人及其重臣霍建寧昨日現身業績記者會，和黃3G成績自然是熱門問題，雖然和記仍未在港推出3G，但霍建寧同傳媒講，自己「已經用緊」，咁超人呢？原來仍然用緊2G，但佢老人家話兩星期後便會「丟」了部舊機，全面採用3G服務。
講到3G，霍建寧突然話想講一個笑話畀大家聽，正奇怪年賺逾二億元的打工皇帝想講乜嘢時，超人立刻有反應，叫霍生「如果係鹹濕笑話就唔好講啦！」即引來哄堂大笑。原來霍生想講自己真係「日理萬機」，因為每日處理一萬部3G手機推出。佢當然希望愈理愈多機，10萬部機也不拘。
圍繞超人的話題可說多不勝數，其中最多人關心嘅都係民生問題，例如港燈電費特別貴，超人話，有研究報告指香港人最大的生活開支其實係交通費，咁佢是否贊成公共交通機構減價呢？超人即刻耍太極，拒絕回應。
李氏家族再添一成員，超人大公子域陀（李澤鉅洋名）三度弄瓦之喜，有記者追問超人新孫女名稱，小超人唔肯講，點知超人重肉緊過在場記者，即刻問域陀「做乜唔講呀！」域陀就笑笑口話：「佢咁細個，唔想咁高見報率」，最終仍沒有透露小女兒名字。