同志組織彩虹行動星期日大鬧教堂，激到主教陳日君紮紮跳，連一哥曾蔭培都話要跟進研究有冇需要採取進一步行動，雖則件事重有手尾，但原來搞手之一Tommy仔陳諾爾前日已經靜悄悄離開香港去咗美國，有人指佢移民，相信短期內唔會返香港。
曾就讀中大物理系嘅Tommy仔算係香港同志界知名人士，經常為爭取同志權益上街抗爭，最激一次係前年八月一身SM鐵鏈裝扮遊街示威。估唔到星期日衝入教堂原來係Tommy仔臨別最後一擊，據講佢上機當日，一班好友同埋Tommy仔媽咪、細佬一齊食飯為佢餞行，但大家都唔願多講詳情，連佢喺邊度落腳都唔肯講，有份送機嘅長毛梁國雄只係話Tommy仔唔係第一次去美國，至於幾時返嚟就唔知嘞。
一位彩虹行動成員話其實唔少圍內人都知Tommy仔想離開香港，「佢不嬲都話呢個地方唔適合佢，可能嚮往嗰邊生活多啲啦。」其密友則爆料指過去兩年Tommy仔已去過美國三次，呢次遠行亦早已計劃好晒買定機票，絕對同衝入教堂事件無關。八方都相信Tommy仔唔係「着草」，但如果第日警方有任何行動，使唔使引渡佢仔返嚟協助調查呢？
（圖）Tommy仔前年以一身SM鐵鏈裝扮，同彩虹行動成員到中環示威。
傳真︰2623-9278
電郵︰