林敏俐（Tiffany）決定在星期六港姐決賽卸任後，不留戀五光十色的娛樂圈，下月就返三藩市繼續純樸的大學四年級生活。這個決定，她考慮足足超過半年，「如果我未入大學就選港姐，可能會留低，但我都讀咗三年，還差一年就畢業，點解唔完成埋學業先呢？」做事有始有終，十分贊同！九月初，她就離港，趁有空檔，決定來個香港遊，為增加刺激度，膽粗粗在崎嶇不平的石澳後灘踩單車！
記者：梁佩芬 攝影：陳盛臣
為了肩負港姐職責，又要有高貴、斯文、大方的形象，Tiffany放棄了一直熱愛的運動，以前幾乎所有運動都有她的份兒，像越野單車、攀石、拳擊、足球、游泳……損手爛腳一樣冇有怕。現在既然離港在即，她也顧不了夏日火辣辣，一於入石澳，踩單車入叢林，飛車落地，非常有型。玩完後，香汗淋漓，喘着氣：「真係好耐冇試過戶外活動，好似喺美國日日踩單車返學校嘅感覺，如果今日唔入嚟，都唔知石澳重有個後灘，好靚呀！」
以往，Tiffany最愛踩單車返學，外國地方大，隨便找個位置也可以放單車，所以她用的都是傳統不能開合的單車，如今身在香港，當然就要試試適合香港狹小環境，便於存放的摺車了。第一次玩摺車，感覺如何？「可能呢部車夠大，幾穩定，不過好似重咗啲！」
Tiffany踩的，是日本最流行摺車之一的Birdy，也是目前為至，功能最齊全的摺車，前後避震性能高，最高時速可達68公里。但是，要達到如此高速，零件也斤両十足，全車共重10.5kg，要拎出國旅行踩車就太笨重，反而適合香港郊野活動。
當然，新手Tiffany都不太清楚如何揀摺車，就由售賣摺車近十年的夏先生教路，看看時下最流行的摺車是哪幾部！夏先生話新手通常睇價錢買車，平的最襟玩；熟悉摺車特性後可以轉買高性能的貴價車。
摺車在90年代中出現時，流行程度一般，主要原因是車身非常輕，難起動，有「飄」的感覺。但經過㗎仔的大力鼓吹及改良後，「飄」的缺點開始減退，尤其這款全新的Zerobike，只得8.1kg，摺合後呎半長，屬全球最細最輕的摺車，有四齒輪，起動力小，開車時不會有太大搖擺，非常穩陣。
CityHopper$3,280(b)
摺車最緊要輕巧，好多時為配合這要求而令車身短小，平衡會較難。而CityHopper2003年版的新車，就針對此問題，車身較長，容易平衡，不會有「飄」的感覺。車身長了，但重量還可以接受，只得8.9kg，平時踩車出街甚至去吓旅行都非常方便。
Jumbo$550(b)
雖然摺車大受歡迎又流行，但價錢仍然高企，令不少初入門想玩玩的人卻步。但中國製造的摺車就只需$550就有齊避震、調校車頭座位高度、波速功能，連外賣仔都踩住送飯，況且，中國造單車歷史悠久，質素有一定保證！
DahonBoardwalk$1,680(a)
Dahon（大康）是一個香港商人的名字，數年前移民美國，開始發展當地摺車生意，更發明了不少特別的摺車鍵，減少摺車及開車時間，現在大康共擁有超過100個摺車鍵的專利權。正因如此，這部Boardwalk的開合時間只需15秒。Boardwalk雖然較重，有12.5kg，但勝在開合容易，最適合出外旅行玩樂，好似店主夏先生就曾經帶着它往北海道旅行踩車。
店舖資料
a.旺角單車專業公司
地址：旺角通菜街180號地下
電話：23809868
b.天寶單車公司
地址：旺角通菜街152號閣樓
電話：23923863
1.港姐冠軍
「可能返美國後，我都係幫媽咪做生意，生活與未選港姐前一樣，但如果不是當日決心回港參選，我就不會見過那麼多世面，至少學識不少待人接物的態度，這些經驗，就算做生意都未必學得到！」
2.台慶司儀
「選港姐都不是太緊張，因為恃住冇人識我，就算出了錯，都不會影響大局，最多得唔到獎！但第一次接Job做台慶司儀，卻令我失眠咗幾日，就算一句簡單的開場白，我都對住塊鏡練咗五、六十次，但最後都係錯咗，嗰晚我真係好驚，因為隔鄰企晒肥姐、DoDo、志偉喺度，壓力太大啦，你知啦，喺台慶做錯事，全世界都知！」
3.英文老師
「做『輕鬆英語坊』好開心，可以教人英文自己又學到好多嘢，坦白講，好多節目裏面嘅英文，我都係第一次接觸，做過主持後，先知道自己嘅英文都係有待改進！」
4.日本雪雕
「上年去日本做雪雕比賽嘉賓，香港隊得到冠軍，我哋個個都好開心，特別係其他參加者過嚟恭喜我哋時，問：『點解香港無雪落，你哋啲雪雕都咁靚嘅？』我自己都覺得好榮幸！」