經紀黃今次真係冇估錯，東方海外（316）噚日公布中期業績，真係靚得交關，股東應佔溢利有成7949.4萬美元，比去年同期勁升76.33倍，但唯一小小唔滿意，就係中期息只得3.85美仙，即係每股0.30元，以一隻十幾元嘅股份嚟講，未免奀豬咗多少。
東方海外連日勁升後，噚日終於見到回吐，跌5.11%，收14.85元。經紀黃話，大家唔使太擔心有人趁好消息出貨，如果隻股跌散咗，對好多人會唔方便。
潮流時興炒紡織股，好似福田實業（420）咁，前晚傳出大股東配售舊股，噚日即見有大手上板，股價收市雖然跌咗5.13%，收7.40元，但仍然企在配售價7.10元樓上，已經好有交代。
經紀陳話，亦係做紡織嘅浙江永隆（8211），早排公布中期業績，雖然盈利倒退40.1%，只得968.4萬元人民幣，但股價只係跌咗一陣已反彈，之後重不斷上升，噚日再升15%，收0.46元，創上市以來新高。日前浙江永隆出現大手成交，造價每股0.34元，據講貨源落在強者之手，睇嚟唔係假。
慕容小初