英國骨感名模姬蒂摩絲（KateMoss），上年底因為生BB而搞到身形走晒樣。經過一輪地獄式減肥後，最近姬蒂獲邀參與美國樂隊TheWhiteStripes嘅最新MV《IJustDon'tKnowWhatToDoWithMyself》，以誘人曲線大跳性感豔舞，我羅拉見佢咁快又再回復以前嘅索女身形，都好鬼羨慕。
今次呢個MV最特別嘅地方，係由姬蒂一個人擔正，而且搵到名導演哥普拉（FrancisFordCoppola)個千金蘇菲亞（Sofia）執導。喺MV短短嘅三分鐘裏面，只見到姬蒂不停做出挑逗性嘅動作同表情大跳PoleDance，雖然成個MV都係黑白，但係姬蒂一身性感打扮，已經令好多男士想入非非。
其實姬蒂近期繼英國組合PrimalScream、HarMarSuperstar後，第三度喺MV現身，據聞佢喺十月十五號又會為一個慈善演唱會首次喺舞台度開腔，唔通姬蒂做厭模特兒，想踩埋入歌唱界？