醫生C構思出產一隻健康食品，配方度好晒，製造廠搵埋，只欠一樣，就係產品牌照。佢問計於啤酒專家T，因為專家T係生物化學碩士，又去過英國研究啤酒製造，對健康產品亦熟。專家T話：「麻煩到極。你去問藥物局，佢哋會答你：唔係西藥，我哋唔理，問食環署就掂。食環署會答你：唔使牌照，於是你就照去馬啦，如果隻食品唔賣得，你就蝕到渣都冇。如果賣得，就有競爭對手寫信去中藥局、藥物局之流，投訴你隻產品含有中藥或者西藥。當局會立即禁止出售，再慢慢審查七、八個月，問你死未。」醫生C當堂面青，因為事實上佢最近畀啲有關部門耍太極推手，玩到頭昏眼花，正想把心一橫，出咗先至算也。
專家T班朋友以前出過一隻lotion（洗液），內含抗生素，幾好賣，推出市場三個月，立即俾競爭對手向藥物局投訴，停售，搞咗八個月，攞到批准，重新投入市場，點不知同一時間有幾隻同類產品同樣含有抗生素，一齊在市場上鬥搶，於是生意分薄晒，賺唔到錢。原來啲對手吼到實，投訴之後，在禁售期間，已經改頭換面，照抄產品成分，一到政府批准，立即推出同類產品。專家T話：「行先嗰個，冇乜着數，小本經營，更可能為他人作嫁衣裳。」醫生C聽完，方知商場競爭之烈，乜手段都有，做醫生日日對住病人，冇咁複雜也。