無綫新劇《彩虹橋》噚日喺將軍澳電視城試造型，演員有廖啟智、胡杏兒、李彩樺同謝君豪等，智叔嘅三歲囝囝文諾早前證實患上血癌，智叔重專登請假同老婆陳敏兒衣不解帶咁照顧個仔，噚日馮仁昭見到智叔，佢瘦咗成個碼，不過佢重識講笑話自己只係做司機，負責吓啲物資供應，反而老婆就比佢辛苦，成日要陪住囝囝。
至於文諾嘅病情，智叔話佢啱啱完成咗一個為期三十三日嘅化療療程，病情亦已經穩定，不過最心痛就係見到個仔咁細個要抽骨髓，佢話：「聽到個仔半睡半醒咁叫阿媽，真係好心酸，不過好彩佢經過化療後冇發燒同對藥物冇過敏反應，𠵱家已經可以返屋企休息，只係要定時返醫院度輸血。」希望文諾早日戰勝病魔啦！
陳松伶加盟環球後首張大碟終於推出，早前松松好心急想知道反應，專程走去唱片舖視察行情。唱片公司噚日就公布隻碟大賣嘅消息，向松松大派定心丸。
另外，松松最近迷上玩瑜伽呢個玩意，早前買咗隻VCD自學後，覺得皮膚同精神都好咗，𠵱家重話會報讀有關課程㖭。
何韻詩噚日以護膚品牌Neutrogena最新系列代言人身份，出席宣傳活動，佢重即場示範為模特兒落妝。對被揀中做代言人，何韻詩話：「我自己都好surprise，入咗行六年，第一次俾護膚品揀中，我覺得自己可以選港姐。」問佢有冇興趣拍衞生巾同豐胸產品廣告？何韻詩話：「衞生巾OK，大家都會用；至於豐胸，自己『夠使』，呢排又第二期發育，有需要縮胸。」
男子組合Boy'Z早前為新歌拍MV，平時佢哋兩個跳跳紮，今次導演特登考佢哋，要Kenny喊之餘，又要Steven浸喺浴缸度閉氣幾分鐘。本來導演諗住Kenny係新人，所以準備咗支眼藥水畀佢，點知Kenny一埋位話喊就喊，導演睇到拍晒手掌。而Steven竟因為NG咗好多次浸到皺晒皮，佢話拍呢個鏡頭好似自殘咁。
黃凱芹前日喺成都登台完返港，對於倪震日前同周慧敏高調拍拖出席首映禮，倪震笑指黃凱芹返咗香港，所以要睇實女友，黃凱芹就笑住話：「多謝倪生，我相信佢嘅意思係要睇實我，因為我咁耐冇返香港，好多嘢唔識，好似有次我要買電腦，原本係周小姐陪我買，最後都係倪生陪我。」
陳文媛（BoBo）最近接受雜誌訪問，提及佢同陳冠希嘅感情好好，但一提到鍾欣桐（阿嬌）就唔高興，BoBo噚日為咗呢件事打電話去電台節目度澄清，BoBo話：「佢哋寫嗰啲，都唔係我答嗰啲，咁樣屈我就唔得。」
BoBo又解釋佢同陳冠希係朋友，但同阿嬌就唔係好熟，所以唔可以話係朋友。
