香港人出晒名難服侍，無論衣食住玩，都要求多多，無番咁上下噱頭，又怎令他們乖乖付錢消費呢。最近有間五合一的聯誼會，雀局加飯局外，還可篤波、打街機和腳底按摩，成為葵涌區最新的蒲點，今次特別帶一班年輕Model，踩場睇睇有幾好玩。
記者：區佩嫦
攝影：林栢鈞
Model：Kin、Ryan、Jenny、Denise、Vivien、Joanna（FromSunSpot）
聯誼會主打始終是雀局，這裏力賣擁有全港最多自動洗牌機，場內25間雀房，有7間擁有自動洗牌機，6間屬廣東牌，另一間則是台灣牌，最適合懶洗牌兼貪新鮮的人。負責人表示，大部份打算「打長久戰」的人都選擇自動洗牌機，因為的確慳力慳時間。一班Model見到洗牌機，唔使叫已經自動埋位兼要求負責人教玩。講真這部機在日本十分流行，香港則較少見，有機會梗係試試點玩。
推牌落坑
洗牌機輪流使用兩副不同顏色的麻雀，每打完一鋪，按中央骰架Start掣，骰架便會升起，你只要將所有牌推進坑內，然後再按Start掣，另一副早已砌好的麻雀便升起，乾手淨腳。
按掣打骰
打骰，按Dice掣便可，骰架還有莊家顯示燈，邊個打骰一目了然。
玩到Hang機
這班Model絕對是大細路，除了狂打麻雀唔記得影相外，還專登放少一隻麻雀落坑，搞到部機不停洗牌唔識停，經常Hang機，實在貪玩。
收費
優惠價：$88（早上7:00至下午6:00任打）
正價：每小時$40
*自動洗牌機每小時加$10
雖然$88任打幾抵，不過食物要另外order，打雀局套餐有着數，這裏有打足11個鐘的午餐套餐、打足24小時的午夜套餐、晚上11時至翌晨7時貓頭鷹時段的三文治或公仔麵餐等等，套餐款式多，總有一款合你胃口。
午餐例湯至正
眾多午餐雀局中最受歡迎便是這個$198套餐，有例湯、蘿蔔牛腩煲、豉汁蒸魚雲和清炒時菜，例湯又香又甜，簡直有超水準表現，十枱有七枱都食這款。
晚餐食得豪
夜晚可以食豪一點，$518任打24小時兼有花雕雞、白灼蝦、清蒸海斑、龍皇湯羹及任選兩款小菜，總共五餸一湯，出街齋食都唔止這個價錢。
這裏附設近3000呎的遊戲機中心，機款勝在夠齊兼夠平，大部份比市價平$1至$2，射擊Game$2一局，部份舊款機只不過$1局，難怪經常高朋滿座。全場焦點機是至新的EZTouch（$2），6個Model聯手玩一部機，玩到嘻哈大笑、手舞足蹈，可惜破唔到紀錄！
場內共有71部街機，鍾意玩乜都得，最受歡迎的賽車、射擊、PhotoHunt都有，人多的話，分分鐘要等半粒鐘先有得玩。
不知是否因為傅家俊的關係，不少年輕人均愛上打桌球，這裏話明一站式服務，此年輕人玩意當然唔少得。一班大細路更話要比試一番，男的充當教練，女的卻資質有限，結果當然沒有一個可以一Q清袋喇。
桌球室內共有21張波枱，亦有安裝電視機，每當有足球比賽，便可邊篤波邊睇比賽，雙重享受。
收費
正價：凌晨1時至下午5時每小時$48、下午5時至凌晨1時每小時$68
優惠套票：早上8時至下午1時每張枱$68、下午1時至下午3時每張枱$90（包2份午餐）
*持學生證另可享七折優惠
打完麻雀可能會周身骨痛，不如來個腳底按摩疏乎一番。這裏的按摩師傅全為香港人，唔使聽唔鹹唔淡的廣東話，而且手勢不錯。
ModelRyan怕痛，師傅最初就住力輕按，Ryan衰多口：「我睇電視見腳底按摩啲人都唔係咁，佢哋個個都大叫，𠵱家我又唔覺得好痛喎。」師傅聽完後立即大力一按。在旁的我只聽到Ryan一聲慘叫，之後滿臉通紅。問師傅Ryan身體邊個機能有問題，師傅風趣地說：「腎呀！腎虧。」
收費
正價：每小時$108
*第二個鐘可享半價優惠
優惠套票：10次$680（每次1小時）
茶餐廳深受附近上班族歡迎，負責人賣花讚花香：「價錢夠實惠，午餐$23有兩餸餐連飲品，一般飲品都係$10至$14一杯，飯麵由$23至$50不等，全部都好受歡迎，若果遇啱有足球賽事，我哋重會直播比賽，不過就有MinimumCharge，每位$38。」
富仕桌球聯誼會
地址：葵涌和宜合道26至30號
電話：24813328
*新張期間免入會費，兼享9折優惠。
*現惠顧者可享$7一小時泊車優惠。
會員可將消費變積分，於下次惠顧作現金使用。