米杜士堡今夏喺轉會市場幾乎斟親球員都觸礁，估唔到接近八月尾終於借到文迪達；據聞係呢件西班牙中場自願揀米記，而放棄加盟其他幾間球會。米記成日俾人話唔夠魅力，呢次重唔一鋪返晒嚟，威到盡？
據文迪達個經理人講，原來共有五間球會想向拉素借文迪達，包括西甲馬體會同埋畢爾包，不過文迪達一意孤行要投身米記。由於米記喺個工業區入面，無乜娛樂，被標籤為悶市，當年法國佬卡林保同佢嗰位勁索老婆艾麗安娜就頂唔順，唔走唔得。𠵱家米記有個兩年前身價重講緊係三千萬鎊嘅文迪達，肯委身加盟，隊波即刻加咗啲星味，而一個唔覺意文迪達踢番當年效力華倫西亞嘅水準，米記就有福囉。
禮拜日利物浦對車路士場波，當地攝影師不斷捕捉車仔老細阿巴莫域治。佢喺場邊睇到不知幾肉緊，最後車仔贏波呀油王就即刻同身邊嘅人擊掌，好似贏咗聯賽冠軍咁。今個禮拜六對李斯特城，係車仔今季首度主場出師，油王肯定御駕親臨。我求大俠就要硬車仔嘞。
呢排有關馬基列尼同皇馬關係惡化嘅新聞，可以話無日無之；而且皇馬講明唔會賣佢去車路士。我求大俠覺得皇馬一方面知馬基列尼唔妥球會，但同時又知冇咗佢唔得。話晒隊波喺禮拜要同馬略卡爭西班牙超級盃，可能重要靠馬基列尼。鬼叫皇馬上場橙盃對華倫踢得衰咩。
出年歐洲國家盃主辦國葡萄牙已經全面備戰，噚晚對哈薩克只係決賽周前第一場熱身賽，嚟緊重有八場。教練史高拉利噚晚特登派助教去睇挪威對蘇格蘭場友賽，講明想了解挪威實力（葡軍下月十號友賽挪威）。連挪威呢啲二線隊都唔敢睇漏眼，可想而知葡國備戰真係唔講得笑。
足總前日先定到今季甲組賽程，原本去咗清遠集訓備戰嘅南華見下個月中至有波踢，大軍噚日返嚟香港先諗點樣準備。計我求大俠話，其實足總過去編賽期同球會溝通已經好有問題，經常搞到啲球會無所適從，如果足總重唔認真改善行政同管理，真係想搞番好足運都難！