大市繼續調整，但有新資金入市，個別股票受追捧。恒指收市跌33點，但上升股（不計認股證）320多隻，比下跌股264隻為多。由於滙豐（005）除息，期指回復「原狀」，收市高水8點。
國企調整一日，又再上過。噚日早市「係咁意」跌一跌，下晝買盤一湧入市，又掃到飛起，個別股票高低價相差成十幾個位，大部份都高收，最勁係洛陽玻璃（1108），升12%，吉林化工（368）同重鋼（1053）亦分別有8.8%和8.5%進帳。中國政府要諗計紓緩人民幣升值嘅壓力，有消息話QDII會盡快出台，其實，中港金融部門已就此進行了頗為密切的溝通，筆者早前收到料話QDII年底前會推出，最新消息係一兩個月後就會有公布。國企拒絕調整，除咗本身業績靚之外，QDII加快步伐，亦係原因之一。
QDII選股，「第一浸」係國企，「第二浸」就輪到「自己友」嘅股票，而有佳績支持，PE特別低者，更會優先考慮，噚日就見到有「春江鴨」活動，大手吸納隻中國製藥（1093），大戶出得手，必有智珠在握，中藥盤數咁正，而在內地投資者眼中，PE又咁吸引，第日股價翻一番亦有可能。
03年度（12月年結）上半年，中藥已賺3.59億元，大增255%，每股盈利23.92仙，派中期息7仙，而第2季盈利更比第1季高出3成，估計全年盈利7.3億元，每股盈利48.6仙，預測PE8倍計，股價已可升上4.0元水平。
中藥大股東石家莊製藥上周五以2.65元配售8000萬股，絕大部份由機構投資者接去，中藥亦趁勢消化獲利貨，在3.0元水平形成旗形，今日若破位而上，升浪再現，短線上升目標3.5元，中線可向4.2元推進。
佑威（627）納米有新搞作，突破成衣範疇，進軍時尚休閒鞋市場，同安朗童話世界合作，計劃未來3年生產1200萬對休閒鞋，估計可為佑威增添逾億元生意額，另外，佑威亦與安朗研究納米布鞋，此方面的市場潛力更大。除造鞋外，佑威正與數間本地老牌的家具連鎖店，洽談家具布料的納米加工協議，以目前進度看來，下月中應有好消息公布。
郭兆誠