巴格達聯合國總部大爆炸，對股市影響有限。恒指是日下跌33點，但計埋滙豐（005）除息，其實略有進帳。
大市由9900水平殺番上嚟，有成700點升幅，回吓氣亦好應該，但調整幅度唔會大，落到去10300水平已有初步支持。𠵱家追揸Put輪未必着數，不如吼低揸Call輪。
滙豐除息走軟，正合趁低收集大笨象Call輪，等正股跌多1蚊左右就郁手。對象係9845，玩到12月初，溢價1.2%，槓桿率17.5倍，呢組數據幾吸引，交投又旺，唔驚轉唔到身。
睇好後市，恒指Call輪自然要昅實。出擊對象係9870，今年12月30日先至到期，大把時間，溢價4.6%，槓桿率19倍，數據唔錯，交投亦活躍，個市再跌多少，就可以收集。唔想咁大槓桿，可考慮9879，亦係玩到年尾，溢價僅1.1%，槓桿率7.6倍，缺點係成交較疏。
是日輪王係路勁公司輪359，由1.9仙飛上3.5仙，大升84%。呢件末日輪下月2日最後買賣，5日到期，行使價5元，負溢價0.3%，槓桿率144.3倍。一睇呢組數據，就知隻輪必定大上落。正股（1098）現價5.05元，以平水計，正股升1格（5仙），隻輪應值1毫；正股若跌1格，隻輪只剩1仙。
章盛