今年個仔放暑假由美國返港，三婆又有盒禮物送畀趙飛雲，不出所料，又係過期嘅金莎。老人家唔食朱古力，過年收收埋埋嘅糖果又唔捨得隨便送人，唯一用途係送禮，有時難免放耐咗，趙飛雲但求有心，從來唔會介意，但堂堂大上市公司，派送玩財技，過得自己唔過得人，就認真惹人反感。
趙飛雲噚日晨早沽出九倉（004）計數，原因亦唔使多解釋，有時揀股票真係唔可以忽略高層嘅作風。
美股杜指周二晚拗腰成功，倒升16點，收9428。納指亦升破降軌阻力1740，上升21點，收1761，距今年高位1776愈來愈近，照目前技術的向好趨勢，升破的機會相當大，但惠普於市後公布業績欠佳，美股期指偏軟，昨晚或有回吐。
港股周一先高後低，已露調整迹象，但美股維持強勢，淡友縱然有滙豐（005）除息之助，亦不敢貿然出擊，恒指最後跌33點，收10475，計及滙豐除息，其實係上升30餘點。
長實（001）及和黃（013）公布業績前造好，繼續支撐大市，如果今日業績冇些少驚喜，恐怕會出現回吐。港股短期升定跌，主要睇長和表現。
新地（016）昨日雖反彈1個價，收51.50元，但走勢仍係先高後低，並低於平均價51.87元收市，形勢未見改善，另一隻大型地產股恒地（012）跌幅更有擴大趨勢，昨收27.25元，跌0.35元，反映大地產股繼續回吐。市場憧憬孫公第10招救市措施會提前推出，加上有內地投資者買香港樓報道，氣氛其實利好地產股，但實際上恒地及新地沽壓未減，並非吉兆。
趙飛雲