內地客以個人名義來港旅遊，為本港帶嚟唔少商機，個別行業反應快，已有行動。經絡集團噚日成立「自由行按揭專組」，夥拍銀行提供度身訂做樓按產品。
為咗要快人一步，吸引市場注意，佢哋喺傍晚趕製全新廣告，今日出街。聽講成班同事做咗兩個鐘至搞掂。雖然睇落有啲面善，好似係將原本用緊嘅廣告改頭換面而成，但係都唔可以唔讚佢哋反應迅速。
睇嚟其他受惠行業會盡快公布新優惠，同埋推出新廣告，遲啲甚至連諗得出嘅拉車邊行業，都會以內地嘅自由行客做對象，大搞宣傳。
其實一直有內地客嚟港買樓，但一向少為傳媒廣泛報道。如今政府也不斷宣傳自由行對港嘅好處，加上相關行業乘勢大搞宣傳，所以內地人在港置業變得熱火朝天。
九倉葵涌工貿樓都會坊，最吸引嘅地方，可能係物業多用途發展概念同高樓底等。但原來呢個盤每個月冷氣同管理費，每呎只係兩個半，十分吸引，勾起九龍核心商業區客戶嘅興趣。
中原地產就尖沙嘴區商廈冷氣同管理費，做咗個調查，結果顯示，每月每呎由最平兩個半，至最貴五個二。
難怪都會坊嚟自九龍核心商業區嘅參觀客戶，佔一成八，僅次於葵涌同區嘅百分之三十一。第三位係長沙灣客戶，佔百分之十二。
講開又講，一直對多用途工貿項目感興趣嘅香港經貿商會會長李秀恒，原來日前都參觀過都會坊。
佢年初時以五千五百萬，買入黃竹坑偉晉中心及立興工業大廈，相信今次係嚟取經。
上個月樓市後勁不繼，對代理嚟講，係一個考驗。不過，中原山頂南區組高級客戶經理Raymond（馮嶽宗），反而喺逆境中表現更加出色，佢個人做到一百七十幾萬佣金，全公司最多。
Raymond上個月只做咗五宗成交，已經有咁好成績。佢個人促成嘅交易有四宗，當中一手包辦山頂和福道20、24同26號屋買賣。另一宗係大潭龜背灣別墅。至於同人合作促成嘅物業係壽山村道南源。
聽講Raymond上半年都好好數，平均每個月佣金收入超過三十五萬。拆帳後落袋嘅都好可觀。
專門投資車位同豪宅嘅廖烈正夫人廖湯慧靄，胞弟湯文亮噚日買咗近日熱賣之一嘅豪宅畢架山一號（圖四）自住。買入十座十二樓相連單位，二千八百呎，作價一千二百四十八萬，呎價四千四百五十七蚊。
咁啱湯文亮位千金湯振玲係今屆會考生，成績不俗，據聞有六科A。
長實上個禮拜就為促銷個盤，搞咗個「A級獎學金計劃」。買家嘅家庭成員係今屆會考生，每考到一個A級成績，可獲1萬元獎金，湯生個千金攞到六個A，應該有六萬蚊獎金，驗證咗「一分耕耘，一分收穫」嘅道理。
放寬內地人士來港旅遊，有助本港經濟復甦，零售業率先鼓掌歡迎。物業市場有望也受惠，日前一名內地客來港買居屋嘅新聞，經報章大事報道後，瞬即成為熱門話題。兩家地產代理亦洞悉商機，立刻召開記者會，講配合內地人嚟港買樓新部署，反應極之快。
中原地產原定噚日朝早十一點半同埋下晝三點搞樓盤優惠記者會，眼見內地客來港新聞成為城中熱門話題，立即應變，臨場加插「睇樓自遊行」計劃記者會，各大報章及電子傳媒亦派員出席，捕捉呢個最新消息。
美聯物業不甘後人，臨時喺下晝四點半召開緊急記者會，講自由行會否令中港置業趨勢轉移情況。
究竟內地人嚟港，為香港帶來幾多商機，仍係未知之數。
蘭西
電郵地址：
