立法會議員陳智思上月去美國動心臟大手術，已經逐漸康復，佢話畀八方聽，半年後要再返美國檢查吓放入血管個條6mm闊、19mm長嘅管係咪OK，𠵱家暫時就冇事。
陳智思逃過開刀之劫，佢話好好彩。離開咗香港三個星期，喺皇馬作賽前一日先返嚟，感覺竟然係兩個世界。去之前，老董剛宣布押後23條立法，全城充滿怨氣；返嚟見到市民排隊等睇波，人人興高采烈。
不過，令陳智思最感動嘅係佢一到侯斯頓，有間叫做「金大碗」嘅港式餐廳，老闆娘金花一眼就認得佢，重知佢去醫病，消息咁靈通，原來係拜傳媒所賜。老闆娘係都要煲啲鮑魚靚湯畀佢飲，重送到去酒店，真係人間有情。
做完手術之後，佢當然時常去幫襯，重特別畀多啲貼士㖭。
傳真︰2623-9278
電郵︰