英國《太陽報》爆料，車路士中場華朗策劃咗個二千哩「長征」，打算由曼徹斯特揸車到倫敦來回五次。大家咪誤會，華朗並唔係咁好死參加慈善巡遊，只係佢信唔過外人幫佢運車，寧願自己揸，佢咁做未免太小心眼，真係食完飯無嘢做嘞。
華朗不愧係愛車之人，喺英國擁有法拉利Maranello、法拉利Spider、Merc、林寶堅尼同埋HummerH2五架豪華轎車，總值六十萬鎊。由於佢由曼聯轉投車路士，需要將座駕搬運晒去倫敦，決定來回五次（每次車程四百哩）。據佢友人講，佢除咗怕人整花佢啲車之外，重好享受揸靚車畀人睇嘅感覺，所以今次咁做都有啲虛榮心作祟。查實華朗啱啱幫車路士砌低利物浦，踢出身價波，威過威士忌啦，使乜靠呢啲無謂嘢攞威？
西甲奧沙辛拿呢排放晒風聲，話伯明翰肯放番阿根廷前鋒費古羅亞嘅擁有權畀佢哋，而佢哋好願意畀番二百五十萬鎊畀伯明翰。不過我求大俠覺得伯明翰一日未回應，大家暫時都咪信十足。話晒伯明翰前鋒杜加里受傷後，唔多夠前鋒用，唔似肯放棄費古羅亞喎。
阿仙奴後衞蘇甘保真係唔知行咩衰運，上季尾同今季初頻頻做「紅牌阿姑」，𠵱家重等緊紀律聆訊。咁重唔止，佢因為背傷踢唔到今日英格蘭對克羅地亞場波，造就厄遜獲補選。假如厄遜把握到呢個機會，博得艾歷臣歡心，記住要多謝阿仙奴舊隊友蘇甘保囉。
姚明返到上海老家好食好住，搞到重咗成十五磅，最近重驗出有高血壓㖭，嚇到火箭新教頭雲根迪標冷汗，馬上搵咗體能教練專程飛去上海，強迫姚明節食，重話明唔畀佢食鍾意嘅牛排同雪糕，搞到一向無肉不歡嘅「明王朝」無啖好食，叫苦連天！無辦法喇！鬼叫你係NBA明星咩！
各位餓咗波好耐嘅NBA迷，相信一定好想睇吓夢幻六隊嘅精采表演，我求大俠最近發現原來收費台有得播，而且重好抵睇㖭！睇足美國隊全部十二場嘅美洲區預選賽，𠵱家預訂都只係收三百蚊，認真抵！比啲高爾夫球比賽，只係打個四日波，就要收成四、五百蚊，可以話係好超值！