江華同麥潔文（Kitman）結婚十周年，噚日喺九龍塘羅浮宮影完恩愛婚紗照之後，就去咗周大福買咗條鑽石頸鏈，吸引咗唔少師奶圍觀。Kitman試咗幾條，結果揀咗條三十六萬八千蚊嘅頸鏈，但佢就戥老公肉赤，於是乎就同珠寶店嘅經理講價，成功減咗十三萬，以二十三萬八千蚊成交，江華即時簽支票畀錢，事後江華話唔肉赤，最緊要係值得同開心。而Kitman勁冧之餘，不忘送番隻自己嘅個人大碟畀金行經理。
早年曾有傳江華同其他女藝人有路，記者見Kitman𠵱家咁幸福，問佢覺唔覺得自己守得雲開見月明，Kitman有感而發話：「好多朋友都話我苦盡甘來，但我唔覺。我隻新碟有首歌《滿身傷痕》，係自己作曲同填詞，講自己對感情嘅心態，嗰時對感情好冇安全感。」而身旁嘅江華就好似領會到Kitman嘅意思，佢話：「我承認自己之前唔係好成熟，𠵱家都重係大細佬，但我比以前明白多咗，我學會珍惜。以前我都幾浪子，唔鍾意返屋企，但𠵱家唔會。」
蔣怡噚日去香港設計中心為嬌蘭香水擔任模特兒，佢着Loewe服裝上陣，但見蔣怡不時拉高件衫，問佢係咪怕走光？佢話：「係呀，件衫有啲鬆。」喺活動上播映嘅香水廣告中，模特兒裸露上身演出，問蔣怡有冇勇氣嘗試？佢話：「我嘅底線係露背，如果要我露點，多多錢都唔制。」
女子組合Twins噚日接受港台《娛樂滿天星》訪問，原來不知不覺間Twins出道兩年幾，已經出咗十三張碟，主持人周國豐一聽到就忍不住話：「嘩！咁咪好掠水，質素咪好差。」阿Sa即刻反駁話：「唔係掠水。」阿嬌就話：「𠵱家錄歌比以前好，我哋會有個錄音期，以前拍緊戲，一有空檔就要去錄歌。」
噚日有報道話李麗珍為咗保護個女，正考慮要個女同許愿脫離父女關係。馮仁昭問番許愿呢單嘢，佢語氣竟然出奇地咁平靜話：「我只可以講，小朋友要父愛母愛，先至可以好健康咁成長，我從來只會喺個女面前講佢媽媽啲好嘢，其餘嘅事我已經交咗畀律師處理。」馮仁昭覺得邊個唔啱都好，阿珍都冇理由剝削個女嘅權利嘅。
