恒指再升100點，股票輪流發展，滙豐（005）郁完之後定住喺102元，輪到中銀（2388）發威，升65仙，收9.15元，正式創出去年掛牌以來嘅新高，又再企響招股價（8.50元）以上。
結果，4件中銀Call輪，排響龍虎榜上頭4位，另有3件亦打入第6至第9。
中銀Call輪升得最爆炸嘅，係9612，收30.5仙，升417%。隻輪下月初夠鐘，行使價8.88元，由價外變成價內，溢價0.4%，槓桿率30倍。
炒中銀輪，要估計中銀升後有冇得去。窩輪係兩面刀，贏之時大大嚿，輸之時則亦係。
個市同大藍籌升咗好多，揀落後藍籌，然後揀相關Call輪埋手，比較穩陣。中移動（941）喺半年成績表公布後散到連19元亦曾跌破，好多人又話要睇18元守唔守得住。
唔使睇得咁淡，中移動會好似兩個星期前和黃（013），結果係和黃彈升畀你睇。上周一推介嘅和黃Call輪9765，就喺6日之內由20.8仙飛上44.5仙，升幅超過1倍。中移動Call輪要搵件炒吓，炒正股追落後，正路對象係9861，年底到期，輪價24.2仙，溢價6.4%，槓桿率7.9倍，總成交221球，佔發行數量超過1半，易買易賣。
章盛