港股昨日再創今年新高，恒指收10525，升100點，成交135億元，動力依然充沛。
恒指前周五在9924以平底反彈，跟住連升6日，昨日高位10527，累升603點，過去個多星期，淡友再受重擊。
趙飛雲上周初仍揸住Put輪，但好彩守紀律，見港股轉勢即刻投降，之後冇積極入市，錯失呢幾百點升勢。現時倉內只有九倉（004），由於買入價略高，目前只有微利，希望九倉今日公布業績較市場預期佳，加埋下半年業務將優於上半年，可以支持股價追落後。
無可否認，好友手上籌碼的確多，恒指上周靠滙豐（005）及新地（016）連升5日，昨日滙豐唞氣則由長實（001）及和黃（013）接力。
過往長和系公布業績通常都會有些少驚喜畀投資者，但今次市場睇法頗參差，較為難估。如果今日九倉的碼頭業務表現出眾，則可以推斷和黃這方面業務一樣強勁，有利整體業績表現，但和黃3G業務始終變數較大，令人捧場得唔安心。
港股昨日升破楔形頂及8月頂部10478，當堂由阻力位變成支持位，如果恒指守穩10478整固，短期會進一步上試10800-10900水平。
另方面，如果長和業績較市場預期差，或後市被睇淡，滙豐及恒生（011）除息後有回吐，新地（016）又升近53元水平短期見頂，加埋中移動（941）跌破250日線，則恒指回頭跌穿50日線9971，再下試250日線9521亦唔出奇。
股票始終係收集同派發遊戲，就算港股今次真係一個新牛市，但每升2000點，調整0.382至0.5亦十分正常，所以趙飛雲今個禮拜都係以觀望為主。
趙飛雲