小初自從年初跟經紀黃買裕元（551）賺過錢之後，已經好耐未試過買10元樓上嘅股票，估唔到噚日小試牛刀，跟經紀黃買東方海外（316），居然可以單日賺到10%以上嘅利潤，真係令人興奮。
小初已經沽咗東方海外食胡，但經紀黃仍未肯落車，佢話隻股可以睇中線，唔使咁心急沽貨，睇埋業績都未遲。
東方海外表現神勇，大升14.8%，收15.50元，再創新高，成交金額高達2892萬元，公司明日公布中期業績，即管睇吓有幾正。
小初噚日向經紀陳索料，問佢有乜好介紹？經紀陳反問小初記唔記得隻中國星（326）？小初同好多朋友一樣，已經沽貨賺錢鬆人，但唔知點解隻股仍然企得咁硬，始終唔肯跌。
經紀陳話，答案就係散戶散咗貨，但大戶未沽貨，所以個棚仍然搭得異常穩陣，股價繼續創新高。中國星再升3.77%，收1.10元。不過，隻股升到𠵱家嘅水位，小初就冇興趣高追，情願睇人哋表演好過。
慕容小初