收到風，阿仙奴已將中場彭拿治外借去列斯，另外又想外借埋前鋒謝菲斯出去。話晒兵工廠今季都冇買人乜滯，兵源唔算充足，至怕借吓借吓搞到自己鬧兵荒就攞嚟衰。計正班高層冇理由唔識計呢條數，唔知係佢哋自視過高，定係有晒後着？
由於今季英超聯轉會條例放寬，開始畀同組別球隊互相借兵，於是阿仙奴就想借晒班年輕球員出去，一於借人地方練兵咁話。不過上季阿仙奴爭霸衰收尾，好多人都覺得佢哋衰計錯數，畀厄遜離隊搞到後防唔夠人用，如果佢哋因為今季又衰「慷慨」，就真係自己攞嚟。即管睇吓隊波借走人後，會唔會跟手買番球員返嚟啦。
孫繼海日前替曼城射入一球，最終三比○大勝主場查爾頓。據佢講入球經過，原本安歷卡可以橫傳畀佢射入，但呢位法國前鋒最後想自己建功，勁射俾門將撲出，點知又落喺「老孫」腳下補中。雖然有幸運成份，但都要佢肯走入禁區先有運行，呢點值得讚！
響車路士前日殺敗利物浦，威到盡嘅同時，車路士舊將蘇拿亦唔失禮，響意大利盃分組圈入波，幫意乙卡利亞里作客贏保柏特亞二比○。呢個亦係蘇拿返老家後第一個官方比賽入球，以呢個老波骨嘅超班實力，照計踢多一兩季好波都無問題，真係希望卡利亞里快啲升班。
蘇拿威風，不過唔係個個老鬼都咁好景。據英國《太陽報》講，前威爾斯國腳桑達斯涉嫌損壞家中嘅氣體流量計，以隱瞞用量而被控盜竊罪，佢同太座日前齊齊被拘捕，話晒佢係踢過好多間英超球會嘅過氣名將，唔係淪落到咁嘅田地啩？
足總因為要專心搞「好」利物浦同皇馬兩場表演賽，所以要今日先至幫本地甲組聯賽抽籤，落實全季秩序，即係除咗揭幕戰愉園同晨曦外，其餘八隊響開鑼前十一日都未知幾時踢同對邊隊，而我求大俠覺得定賽期要幾多時間啫，咁都話要搞完皇馬先抽籤，你話足總做嘢幾「專業」呢？