已故名導深作欣二同佢個仔深作健太執導嘅話題電影《大逃殺II》，上星期四殺入本地，瞬即成為開畫票房冠軍，當日重收咗五十萬港元，打破咗深作欣二自己執導嘅《大逃殺》四十三萬嘅開畫票房成績。本報東京嘅特約記者森林檎，日前就訪問咗喺片中有唔少戲份、扮演學生情侶嘅酒井彩名同忍成修吾。
覺得拍呢部戲有好大收穫嘅酒井彩名話，原本自己身子好孱弱，喺車站行上行落都會氣喘，試鏡嗰排重因為太緊張搞到胃痛。雖然開拍前每星期二同五，都要同班演員一齊去集訓，起初覺得好辛苦，但對身體好有益，彩名話：「拍完套片後，覺得啲肌肉實咗，人又精神咗！」
彩名又話有三個星期去咗荒島取景，佢話：「經理人冇得跟住去，起初我寂寞到喊，後來同其他演員熟咗，我好享受收工同佢哋返酒店浸溫泉！」
而忍成修吾係繼岩井俊二執導嘅《青春電幻物語》後，再演不良少年，但原來佢真人好斯文怕醜，忍成話：「係導演深作欣二吩咐我要做得激啲！」
當忍成得知自己因為《青》片喺香港有唔少fans，覺得好開心。身為王家衞fans嘅佢，就話好想演吓好似金城武喺《墮落天使》入面嘅啞巴角色。