杜德偉（Alex）小時候被母親張露封為「H先生」，皆因他小學考試時曾試過「全軍覆沒」，科科攞「H」；Alex母親又踢爆兒子小時候性格「娘娘腔」，經常因為被欺負而落淚，要兄長杜德智為他出頭。
杜德偉從小便跟胞兄杜德智一樣，極有音樂天份，雖然其母親張露是歌手出身，但張露卻從沒有刻意教二人唱歌技巧，二人一切均是自學而成。
不過，說到Alex的學業成績，卻是毫無天份可言，日前張露跟記者傾談時就踢爆說：「有次Alex好驚咁攞張成績表畀我睇，怕成績唔好會俾我打，我打開張成績表一睇，嘩，全部都係英文字『Ｈ』，即係科科都唔及格，當時我冇鬧佢，但就幫佢改咗個名叫佢做『Ｈ先生』囉。」
Alex跟阿智兩兄弟，感情十分要好，二人一起讀書一起耍樂，從沒試過爭玩具或是嗌交打架的情況發生；因為當年張露經常無暇照顧兄弟二人，所以想出一條妙法，可以將兩個兒子教得貼貼服服。
張露說：「佢哋兩個讀聖保祿小學嗰陣，我日日顧住唱歌，所以我就將照顧Alex嘅責任交畀阿智，要佢教細佬做功課，有乜唔啱就要話佢，阿智要做細佬榜樣，有個責任心，自己就自然會生性啦。」
要教細佬，唔係惡就得，重要講道理，張露表示：「記得以前Alex成日唔肯做功課，阿智幫佢做咗一次之後，叫Alex下次自己做，點知Alex又係唔肯做，咁阿智咪打佢囉！」
小時候的Alex，性格十分「娘娘腔」，跟性格剛烈的阿智剛好相反，每當Alex在學校被欺負或是遇上甚麼問題，他總會哭着向阿智求救，張露笑說：「有次佢哋兩個搭校巴，個司機同Alex開玩笑，唔畀Alex上車，搞喊咗佢，阿智即刻同細佬出頭。」
張露說：「我叫Alex做阿細，但阿智就叫佢做細仔，佢哋兩兄弟一返屋企就吱吱喳喳傾心事，唔肯講我知。」兩人果然是關係密切的好兄弟。
採訪：戴彩煥