上周五美國公布之經濟數據表現不俗，不過美股就俾大停電嚇呆咗，成日牛牛皮皮，尚未反映經濟利好消息，市場憧憬美股周一晚將大升。港股噚日偷步造好，升100點，收10525，成交135億元。不過滙豐（005）升破100元後似乎後勁不繼，一度倒跌1元，最後收102元，冇起跌。
建聯集團（385）只係話公司正洽商出售非核心資產，但股價已勁升69%，收0.022元。據聞公司在傾出售資產時，曾俾人問有冇興趣賣盤，所以吸引投機買盤入市掃貨。黑客則話，當公司考慮出售非核心資產重組業務時，通常都會一併考慮埋應否私有化。噚日此股大升，唔排除有大動作跟尾。
噚日有報道話長實（001）可能夥同于元平出手重組香港建設（190），從而獲得該公司控股權，消息刺激股價急升69%，收0.60元，成交高達1900萬元，但奇怪係連股價異動聲明都未見，要到晚上9點半過後，先至見公司喺港交所網頁發出澄清報章報道嘅公告，大佬，遲唔遲啲呀！
有消息指招商局國際（144）近期頻頻向外吹風，表明會爭取晉身成為藍籌股，噚日股價勁升9.4%，收8.75元，成交高達1.81億元，招商局市值183.6億元，不及中遠太平洋（1199），但超越華創（291）、會德豐（020）、電視廣播（511）及上實（363）。其中有傳聞話電視廣播最有機會被剔除，不過若以市值計，上實係藍籌股中最細一隻，僅119億元。
阿虎