噚日同朋友傾偈，聽到個消息話上個禮拜周潤發老婆中咗六合彩，初時重以為佢中咗頭獎，原來佢只係中咗四個半號碼，佢用咗四百幾蚊買咗一張九個號碼嘅六合彩，獎金有成萬蚊。
發嫂知道自己中獎後，開心到死，雖然唔係中頭獎，但佢覺得呢啲係一種Lucky，不過佢話會攞一半獎金嚟做善事，幫番啲有需要嘅人。
發嫂買六合彩都係湊熱鬧，因為上個禮拜累積獎金有成幾千萬，佢啲朋友叫佢買番張六合彩碰碰運氣，結果佢同朋友各自買咗自己嘅心水號碼，唔知係咪發哥扮過賭神，連發嫂都旺埋，所以無端端中咗萬幾蚊，發哥知道後，就叫佢老婆記得捐錢做善事。
莫文蔚啱啱攞咗台灣金曲獎嘅女歌手獎項，佢亦乘勢推出新國語碟，為咗呢張新唱片「X」，莫文蔚化身做芭蕾舞女郎影相，佢重要瞓喺鋼琴度，做一個高難度嘅「X」動作，「X」喺羅馬數字嚟講，係代表十，即係話呢張係莫文蔚嘅第十張唱片，而「X」又代表X光，大家可以透視莫文蔚嘅音樂世界咁話。
容祖兒（Joey）演唱會將會喺十月十六日至十八日喺紅館舉行，Joey今次喺演唱會入面會嘗試好多新造型，唔再好似以前咁𡃁妹，而是會變得成熟啲同埋時尚啲，所以演唱會海報嘅形象係經過特別包裝，希望可以畀歌迷有新鮮感。
古巨基噚日正日三十一歲生日，佢去咗新城接受《聯Fan所》訪問兼開生日會，佢話今年生日願望希望可以財色兼收，佢話自己就有啲財，但擇偶條件就想對方年輕貌美兼能歌善舞，不過最好係圈外人；唔講唔知，原來佢同蔡卓妍（阿Sa）好老友，而阿Sa早幾日重同埋方力申等人同佢慶祝生日。
最近有報道話候選港姐7號王從希走咗去整容割雙眼皮、又整過個鼻同棚牙，噚日王從希返將軍澳電視廣播城training嗰陣時話：「如果我係整都唔係呢個時候整啦！我唔驚塊面腫咩，點出街呀？美容院裏面有好多服務，總之就唔係整容。」問佢去美容院做乜？王從希吞吞吐吐話：「我去脫毛。」
陳曉東噚日去咗商台做訪問，佢話之前畀記者影到夜蒲，其實只係同一班愛車嘅朋友聚會，佢話影埋佢啲朋友，令佢覺得唔係幾好意思，陳曉東又話因為屋企俾人爆竊，加上佢嘅租約就快到期，所以有搬屋嘅打算。
