唔少中國人都篤信堪輿命理，事無大小都會請教風水師指點。長實豪宅畢架山一號，聽聞有好多人帶埋風水師去睇樓。著名堪輿學家蔡伯勵，噚日同埋買家到畢架山一號地盤實地視察。
雖然地盤危機重重，年屆八旬嘅蔡伯勵，噚日朝早戴住工業安全帽，精神奕奕喺地盤講解風水。佢喺地盤逗留咗大半個鐘，聽講，佢話整個屋苑第十八同十九座風水唔錯，由於兩座地勢最高，形狀似手臂兜住啲錢，有聚財作用。
蔡生親自睇風水比較少見，通常由佢位千金出馬。聽聞，蔡生睇一次要十萬蚊，個女就收半價，畀得起呢個價錢，買家都應該非富則貴。請得呢位大師出馬嘅人，來頭應該唔細，聞說，買家係做東南亞貿易生意，想買個四房單位。
另外，噚日重見到「大姐明」林建明睇樓，佢睇到眉開眼笑，莫非搵到心水樓？
物業管理公司除咗屋苑管理外，𠵱家重提倡關懷社區。新地屬下啟勝管理，同社會福利署合辦「社會日」，喺沙田帝堡城引入嘅盲人按摩服務，推廣到轄下將軍澳東港城、青衣曉峰園同翠怡花園等屋苑。聽講帝堡城嘅盲人按摩服務，平均每月使用人數有二百人次。
啟勝同社署重計劃喺其他屋苑舉辦「社會日」，目的係畀住客多啲了解殘疾人士嘅工作能力，為殘疾人士帶來更多工作機會。
地鐵將軍澳支線通車話咁快就一年，未通車前，區內倚靠地面交通工具，通車後出入方便好多。
噚日係「八一八」將軍澳地鐵通車一周年紀念，美聯物業專誠訂咗個蛋糕慶賀一番，蛋糕上面整埋地鐵Logo，都算有心思，重寫住「樓市暢旺」。可惜，今年受「沙士」影響，縱然該區有地鐵通車刺激，樓價不升反跌。
服務行業因為要面對顧客，若員工態度唔好，會影響公司整體聲譽。服務界有一套「神秘顧客測試」概念，就係搵啲「神秘顧客」，扮成唔同類型嘅人客，測試員工嘅應對態度。呢套測試法喺銀行同零售業好普遍。
香港置業培訓及發展部主管葉國雄話，公司將會推出嘅「優質顧客服務」計劃，會引入呢套測試，喺八九月期間，搵啲「神秘顧客」突擊測試員工。
中原自九九年首次進駐愉景灣，先喺商場開舖，𠵱家搬落地下，成為區內唯一進駐地舖的外來地產代理，噚日剪綵開幕。
中原董事總經理黃偉雄話，咁多年嚟，發展商香港興業都唔租地舖畀佢哋，只可以用樓上商場舖，時至今日，終於可以「落地」，霸番個有利位置。
昔日愉景灣市場由發展商附屬代理壟斷，中原老闆施永青相當不滿，話要向平機會投訴。
愉景灣一向有好多外籍人士居住，唔少租客同買家都嚟自港島西半山，所以，公司決定將愉景灣撥畀港島西及西半山高級營業董事何兆棠管。
佢哋最近喺西半山、薄扶林同愉景灣做問卷調查，成功訪問一○八個外籍人士，發覺外籍客喺香港以租樓為主，揀樓最重要考慮位置，過半數都覺得樓市審慎樂觀，比港人對樓市較有信心。
蘭西
電郵地址：
