由政協副主席霍英東率領嘅廣東社團聯會呢個星期三，即係聽日，一行五、六十人啟程去北京訪問，聽講黨和國家領導人會接見佢哋。
今次訪問好似係擔心香港會變成「動亂之都」嘅中聯辦鄒哲開負責聯繫兼帶隊，咁梗係高規格啦，所以唔知總理溫家寶會唔會親自接見，更唔知會傾乜嘢，不過，7.1後發生過咁多事，大家都以特別眼光去睇中港交流。
而隨咗廣東社團聯會罕有咁高姿態北上之外，有消息話，重有好多不同專業團體包括法律界都會上京，然後親北京政黨好似民建聯同港進聯亦會打正政黨旗號排隊進京，八方忽然覺得好似時光倒流到八○年代初，北京要就香港回歸嘅問題諮詢香港各界意見，於是大家紛紛被召見。
其實港人何必勞師動眾上京？上星期副總理吳儀南下睇大通關，八方重以為老董會去深圳走走，多謝吳儀救佢，點知佢只係走咗去金紫荊同時代廣場。
傳真︰2623-9278
電郵︰