全國人大港區代表喺內蒙古上演一幕大批判，矛頭直指公開批評過特首董建華嘅人大。八方噚日同飛哥傾開，佢猛話好彩有去考察，履行人大職責，否則就冇機會同人大副委員長盛華仁「實話實說」。
原來班人大代表一行二十幾人八號抵達內蒙，當晚食飯盛華仁都在座，席間劉佩瓊爆咗一句，話「聽日就批判」，飛哥唔知乜頭乜路。第日一早，盛華仁就發表佢對人大代表嘅四點希望，叫佢哋唔好發表啲不利香港穩定嘅言論。飛哥愈聽愈唔對路，點知話一講完，大家就起身散會，飛哥企起身話有嘢要講，劉佩瓊、馬力同埋薛鳳旋都走埋過嚟。
盛華仁要趕住返北京，飛哥只得二十幾分鐘單獨交心，於是數盡過去六年香港慘況，老董如何唔聽佢同市民就23條嘅意見，重痛斥個啲「7.1遊行有外國勢力，有人別有用心」嘅報告全是廢話。
最後飛哥重問就算政府有嚴重失誤，做人大係咪唔可以批評政府？「如果係我識點做。」當時盛華仁話佢唔係咁嘅意思，中央只係唔想見到香港亂啫，咁樣飛哥先有心機同佢再講落去。
傳真︰2623-9278
電郵︰