開季前等咗一段日子，李鐵終於可以順利轉會愛華頓，點知日前揭幕戰對阿仙奴後備上陣不智地攞紅牌，同幫富咸入波嘅稻本潤一成強烈對比，我求大俠認為真係好影響「鐵子」今後出場機會。
相信唔少波友球迷都有透過電視直播，睇到李鐵點樣侵犯柏奴亞攞第二張黃牌出場，好多英國球評家都話佢喺對方後半場犯規愚蠢，重影響埋球隊追和嘅機會；就連領隊莫耶斯都話攞紅牌合理。
希望「鐵子」吸取教訓，唔好有下次。雖然莫耶斯賽後冇嚴厲責備，但係我求大俠就擔心，除非有隊友受傷，否則「鐵子」想爭番個正選位置都好難。
一如所料，季尾約滿嘅艾巴喺馬卡爾加盟拜仁後要坐冷板，而喺對波琴場聯賽佢亦只係以後備身份踢咗十三分鐘；但佢只怪自己喺之前兩場聯賽冇波入，惟有接受現實。我求大俠好欣賞艾巴佢咁坦白，但佢與其喺度自怨自艾，不如諗吓自己前途，或者提早轉飯鑊。
新特蘭喺上周中英聯賽盃反底贏曼斯菲特二比一，結束十九場不勝，好多人都認為，以佢班波嘅質素，應該可以反完再反；點知佢哋又即刻打回原形，上周六喺主場輸畀中型班米禾爾○比一，將聯賽（英超同英甲）連輸走勢增至十七場。我求大俠對呢隊波都心灰意冷囉！
有球迷投訴點解講波佬噏樸茨茅夫（Portsmouth）做樸茨茅斯。我求大俠查過大陸地名書係譯樸次茅斯，亦記得八十年代尾喺英甲叫樸次茅斯，之後就唔知幾時變咗樸茨茅夫。不過譯名嘅嘢好難講，例如紐卡素、列斯等嘅大陸叫法重差得遠，習慣嘅啫！唔知講波佬遲啲會否叫番樸茨茅夫呢？
布力般領隊桑拿士喺日前爆響口，佢哋斟緊嘅世界級後衞原來係利物浦嘅前德國國腳巴布。巴布喺前季大病（免疫系統受感染）後，無復當年勇，而利記領隊侯利亞重話明唔阻佢發達，畀佢自由轉會。如果桑拿士諗住用巴布嚟撐起成條後防線，我求大俠勸佢真係要諗諗先。