經紀黃同小初一樣，參加過七一大遊行，亦在遊行期間鬧過董生，但佢話一定會身體力行支持東方海外（316），公司周三公布中期業績，相信會靚到暈，就算股價經已在短短數月內升咗幾倍亦唔係問題。
經紀黃果然真係對事唔對人，只要有錢賺，話之間公司老闆係你仇人都照炒可也，境界之高，小初真係甘拜下風。
東方海外股價由今年3月起步，當時都係4元左右，至上周五已經去到13.50元，升幅超兩倍，如果唔睇公司個名，單睇圖表走勢，真係會以為係莊家股。
經紀黃話，成班外資行一早已經儲齊貨，個個估東方海外今次中期業績，起碼有成5億元樓上。另外，公司早排又公布用成4.6億銀，以每股9.80元向超人買番9%股權。
若以陰謀論，為咗要小股東支持今次回購計劃，東方海外股價升得愈高愈好。
基於以上因素，加埋有外資大行護航，所以東方海外升勢估計會暢通無阻。
慕容小初