有雜誌報道李麗珍與有婦之夫兼育有一子一女的著名髮型師JackyMa相戀，更指二人開迷幻派對。JackyMa的太太昨日接受電話訪問，否認傳聞之餘更揚言會保留法律追究權利，目前正與律師研究。
馬太說：「睇完報道之後好震怒，報道不負責任，影響我老公嘅名譽同事業，對我兩個小朋友亦唔公平。我同阿珍相識十幾年，喺我結婚之前已經識，老公都係透過我先識得阿珍，大家係好朋友。」
馬太續說：「我哋同阿珍住埋一幢大廈，我好多謝阿珍，因為我個兩個月大嘅細女出世當日，好彩有阿珍送我去醫院，如果唔係BB可能要喺的士出世。」對於其夫被指開迷幻派對，馬太強調並無此事，由於報道不實關係，故有必要澄清，保留法律追究權利。