性感小雲雀KylieMinogue近排為佢自己嘅內衣品牌「LoveKylie」拍咗一輯三級出位廣告，搞到fans爭住上網睇。而Kylie嘅澳洲同鄉、名模艾麥菲遜（ElleMacpherson）亦唔執輸，最近為自己嘅內衣品牌拍咗個令人想入非非嘅廣告，擺明同Kylie對撼。
現年四十歲嘅艾麥菲遜喺模特兒界有「TheBody」美譽，近年佢專心搞內衣生意，聽講佢個牌子喺澳洲好受歡迎㖭。不過自從Kylie踩隻腳入內衣界，艾麥菲遜嘅內衣喺英國同澳洲嘅銷量都黯然失色，所以佢最近拍咗個新廣告，希望爭番啖氣。
我羅拉早前喺網上睇過個廣告，發現成個廣告好有偷窺feel，影住一個着住性感內衣嘅女士，喺間房度做出多個挑逗性動作，呢個idea，原來係艾麥菲遜諗出嚟，佢話：「呢個廣告係取材自希治閣電影《後窗》嘅概念，無論係男係女都鍾意偷窺㗎啦！」
不過睇過廣告嘅人都發現，廣告攝影師由頭到尾都冇影過模特兒塊面，咁廣告中人究竟係咪艾麥菲遜？艾麥菲遜就懶神秘咁話：「我唔會揭穿謎底嘅！」