徐天佑自嘲小時因為性格不討好，故不時被人欺侮，幸好每次遇難時，總遇上「超人」打救，有次天佑被人搶玩具，更獲菲律賓男孩以一敵三相助。而年前往日本學藝時，他又獲超人借錢搭車，認真好彩。
二人男子組合Shine成員之一的徐天佑，小時候已長得非常可愛，故家有一姊一哥的他，自小甚獲家人寵愛。日前天佑在柴灣接受本報訪問時，形容其童年並不百厭，但因為性格不討好的關係，不時被人欺侮，幸好每次惹上麻煩時，他總會遇上見義勇為的「超人」拔刀相助。
天佑以前住在黃埔花園，平日他最愛在附近商場及花園蹓躂，有次他拿着玩具跑到花園盪韆鞦，未料卻被幾個比他年長的小朋友搶玩具，使他十分生氣。天佑說：「佢哋偷咗我個玩具，呢個又拋畀嗰個，係都唔畀番我。後尾有個住喺附近嘅菲律賓男仔行過，佢知道我俾人蝦，即刻衝埋去一個打三個，幾勁呀，佢重幫我攞番玩具，之後我同佢就變咗朋友啦。」
天佑小時身邊有不少朋友仔，但他有兩度失去朋友的經歷，令他十分痛心，他說：「嗰兩次都發現啲朋友突然唔見咗，有一個我打咗電話十日都搵佢唔到，原來佢移咗民，另一個就搬咗屋，但之前兩個都唔講，係消失咗。原來唔只感情可以欺騙，友情都可以，幾心痛呀。」
Shine未出道前在東京學藝半年，當時天佑只有十七歲，他記得有次跟朋友吃飯後，自己坐火車返回入住的大久保區時，因坐錯車而要提早三個站下車，但身上已無分文，故只好硬着頭皮向途人借錢，他說：「我問咗幾個人都冇理我，後尾又有超人出現，撞到一個好好嘅外國人，佢重幫我截埋的士，畀埋錢個司機，叫佢送我返屋企㖭。」
採訪：朱芷瑩
