眨眼悠長嘅暑假又過咗大半，呢排大使喺街度見到唔少家長同埋仔女拎住書單周圍買新書，部份鞋舖重人頭湧湧，學童都好忙咁揀心愛嘅返學鞋。不過，並唔係每個家庭都負擔得起仔女開學嘅使費，有唔少綜援家庭同大使呻，自從社署喺六月一號削減綜援金同埋學童嘅就學津貼之後，日常都要節衣縮食，呢輪重成日為仔女開學嘅費用頭痛。
有見及此，蘋果日報慈善基金早前撥款四萬一千多元，資助基督教家庭服務中心舉辦「童更新」社區關懷計劃，募集社區人士捐贈全新嘅開學用品，轉贈給綜援學童。
早排，該中心喺社區度搞咗四次流動收集站，大使去現場睇過，見到街坊嘅反應好踴躍。負責人話收到嘅物資好多，有書包同埋文具，總共要用十二、三個紅白藍膠袋先載得晒，而且重有公司免費送出二百個書包畀綜援學童開學用。
為咗滿足綜援學童擁有基本開學物資嘅願望，佢哋重搞咗「一童有夢想」計劃，透過善長認購學童開學所需嘅實用物品，好似校服、皮鞋、運動鞋或者眼鏡；𠵱家差唔多收到六十個家庭幫仔女申請物資，負責人同大使講，佢哋希望可以幫到二百個家庭，有需要嘅家庭可繼續提出申請。
另外，大使都喺度呼籲社會人士快啲報名成為呢個計劃嘅贊助者，一齊達成綜援學童嘅開學願望（報名表格見下）。查詢詳情，可致電基督教家庭服務中心翠屏社區服務處：27015592或27933573；傳真：23047762；地址：九龍觀塘翠屏道3號8樓。
暖流熱線
電話:29908688
傳真:23702192
電郵:
網址：