紐約大停電，上周五晚美股如常買賣，指數冇大變動，倫敦港股升逾百點，今日港股開大多過開細，高價搶Call輪，未必化算。
揀啲近期相關正股冇乜升到嘅Call輪，或者較為安全。中海油（883）上月最高14元，近期調整後再升，現價13.35元，相信重有多少上升空間，搵隻Call輪買吓，贏面大，對象係9535，隻輪年底到期，輪價31.5仙，溢價負0.2%，槓桿率4.2倍。
講起負溢價，中石油Call輪9232負得重大，輪價70仙，負溢價2.8%，槓桿率3.3倍。中石油（857）下周三宣布業績，派中期息，由於截息期係隻輪到期（11月杪）之前，Call輪冇息收，所以有負溢價。美國股神畢菲特賣中石油股份，原來係誤會，中石油上周跌得冤枉，今周可再升，9232上周五挫低8%，亦可藉正股反彈而回升。
滙豐（005）個勢靚，料可帶動恒生（011），恒生Call輪，9911可以諗吓，隻輪明年4月至夠鐘，大把時間，輪價27仙，溢價2.7%，槓桿率32.3倍。有咁高嘅槓桿率，本應享有較高嘅溢價，溢價咁低，係因為恒生係高息股，去到6.2厘。計埋股息因素，9911嘅溢價實際差唔多9%，但都屬合理。未來幾個月，如果大牛市，9911會升到七彩。
章盛