內地人來港旅遊限制放寬，究竟香港有幾受惠？𠵱家講整體成效可能言之過早，但係最多遊客出沒嘅地區好似尖沙嘴咁，人流就真係多咗，區內商場最得益，據九龍倉助理董事黃光耀講，日前帶仔仔去新世界中心商場參觀小熊國，發覺明顯多咗遊客，特別係一班班能操流利普通話嘅人士。
黃光耀重話，公司旗下嘅尖沙嘴商場，人流好多，連帶場內嘅擎天半島示範單位，周末睇樓客都多咗，過去兩日就有三千人次參觀。蘭西估計，擎天半島屬換樓客大碼物業，有唔少客係國內廠家，佢哋參加自由行來港，逛商場消費之餘，順便去睇吓樓都唔出奇。內地遊客多數會逛商場，所以喺裏面設示範單位有着數。
另外，黃光耀又透露，葵涌都會坊啱啱接獲有物流公司預留十二樓半層樓面，項目已累積賣咗超過七萬呎樓面，每呎一千蚊，買家有電腦動畫、製作廣告公司等。
銀主盤有增無減，已成為拍賣行嘅主要收入。世紀21喺上個禮拜五成立拍賣部，實行分一杯羹，由高級經理蔡漢陞統領，手下有十名同事負責拍賣、聯絡銀主同安排按揭事務。
蔡漢陞喺行內好資深，之前都曾在其他行主持過拍賣部，可以話駕輕就熟。佢哋好雄心壯志，希望喺短時間內可以攞到三成市場佔有率。
隨着深圳不斷發展，住宅樓市也起咗變化，過去一直主導市場嘅羅湖區，地位開始慢慢畀其他地區取代。
據戴德梁行最新深圳樓市報告指出，今年第二季深圳區開賣嘅住宅盤，羅湖區只佔一成二，僅比鹽田區高百分之三，但少過福田、寶安、南山同龍崗區。
造價方面，羅湖每呎五百二十三蚊（人民幣，下同），比鹽田區五百八十五蚊、南山區六百三十七蚊，同埋福田區嘅六百九十五蚊呎低。
至於二手市場，以普通裝修單位成交為例，羅湖區友誼大廈呎價四百蚊，但福田國嶺新村就要四百六十五蚊呎，南山區嘅金海燕花園就造到五百四十一蚊呎。
長實高級營業經理何雨盈，唔止賣樓有一手，原來對園藝好有研究，最拿手種蘭花。佢話近年興起嘅環保樓，都設有露台，最啱就係栽花種草啦。
何生話，露台最適合種蘭花，可以吊起或掛喺牆上，夠晒慳位。佢話蘭花主要分兩類，一類係樹生蘭，喺樹幹上生長，要多啲陽光至開花；第二類係地生蘭，要放喺陰涼嘅地方，有陽光照射就要加遮光網至得。聽講何生好想透過報章專欄，推介種蘭花之道㖭。
北角屈臣道嘅海景大廈，今年業主立案法團開會通過更換管理公司，但舊管理公司一直唔合作，搞到業主立案法團上個月要向法庭申請禁制令，新管理公司置邦物業至可以接管。
置邦常務董事霍德卓話，會致力解決海景大廈在維修、保安、清潔同客戶服務等問題，盡快令大廈回復正常管理運作。
置邦係怡和集團全資公司，𠵱家管理嘅商住同工業物業超過三百幢，樓面近一億方呎，所以管海景應該冇問題。
蘭西
電郵地址：
