女子組合Cookies噚日喺九龍塘坐開篷巴士幫十位候選新成員拉票，四位Cookies成員重送咗隻最新唱片畀候選者。
Cookies由初出道嘅九個人減至四個人，近排又話再添新成員，有傳言話佢哋人氣跌，碟又唔賣得，連公司嘅宣傳費都減，但佢哋所屬嘅唱片公司高層黎志偉就話：「最初嘅Cookies，唱片大概可以賣二萬五千張，舊年人事變動就回落咗少少，但今次呢張唱片都有翻單，暫時銷量都有萬五張。」
Cookies噚日亦異口同聲話唔信傳聞：「我哋日日都有好多工作做㗎，𠵱家重開始賺到錢。聽公司講隻新碟重加印㖭。」問Cookies怕不怕新成員的加入，會影響分紅？Stephy話：「其實冇乜所謂呀！我哋好有信心第時會賺多過以前。」
喺十個候選Cookies成員當中，Cookies就覺得七號何江豪最合眼緣，Stephy話：「其實𠵱家話邊個好，對佢哋好唔公平。新成員最好係個人要夠真、坦白，咁大家先溝通到。」
梁家輝同吳君如日前代表演藝人協會，聯同宣明會探訪淮河一帶受水災影響嘅居民，佢哋要搭兩日車，再行滿布泥濘嘅路先到達。家輝訪問咗個受洪水影響嘅十歲小朋友，個小朋友𠵱家冇學返，一家六口又要住喺帳篷裏面，聽到大家都好唔開心。
孫燕姿之前宣布一年只出一張唱片，因為佢想抽多啲時間陪屋企人同男友。噚日燕姿喺台北西門町出席簽名會，大唱新歌，好明顯聽到佢喉嚨唔舒服。孫燕姿話因為宣傳工作太多，患咗感冒，助手已經每日煲蜂蜜水同魚粥畀佢，但一直都未好番。
章小蕙去台灣賣衫，忙咗幾日之後，前晚佢打扮到靚一靚去酒吧同朋友敍舊，傾到成點鐘先返酒店休息。有人問章小蕙對於有人話佢敗家點睇，章小蕙就撐話當一個人着咗件靚衫出嚟，獲得好多人稱讚，以及令人覺得驚豔嘅話，咁就乜都值回票價啦！
有六個月身孕嘅陳芷菁，前晚接受港台訪問時話照過超聲波，知道BB係女之後好開心，但佢老公就想要個仔，希望芷菁遲啲再追多個。不過芷菁話待產生活好辛苦，成日要打側嚟瞓，腰骨又痛，又要改埋自己嘅飲食口味，所以除非有意外，否則佢唔會再生BB喎！
