胡杏兒因拍《律政新人王》一劇，先後與兩男角林峯和陳鍵鋒傳緋聞，與陳鍵鋒同居之說更言之鑿鑿。而本身已有一名圈外男友的她，面對錯綜複雜的四角戀仍處變不驚。不過，胡杏兒坦言陳鍵鋒給她的感覺很舒服。
胡杏兒在《律政新人王》一劇中，先與男角之一的陳鍵鋒拍拖，但最後她卻與林峯配成一對，想不到在鏡頭後，胡杏兒先傳出與林峯戲假情真，至近日又傳她與陳鍵鋒於何文田共賦同居，這段三角戀竟由戲內延至戲外，的確有點耐人尋味。
胡杏兒對這兩位靚仔另有一番看法，日前她在中環接受訪問時說：「林峯比較識得放鬆，好似有時你愈想做好啲嘢，個人就會愈緊張，但佢對自己好有信心，就算NG都好有心機拍，佢做戲亦都好自然。」
至於陳鍵鋒，胡杏兒就坦言與對方甚為好傾，她說：「我同佢幾好傾㗎，佢個人好friendly，做事一絲不苟，亦好有主見，佢會畀到人舒服嘅感覺，而佢嘅口才亦都好好。」問胡杏兒會否愛上對手時，她馬上說：「唔會，佢哋本身個人同角色都唔同，一跳出嚟你就會知佢嘅性格，roll機時就愛，唔roll機就唔愛。」
對於有報道指她與陳鍵鋒同居，本身已有一名圈外男友的胡杏兒不禁失笑說：「我同佢一齊住？咁我個男朋友去咗邊呢？我同兩個家姐一齊住㗎，但我對呢啲緋聞冇乜嘢，當幫部劇宣傳囉，最緊要唔好講到人格有問題就算啦，其實我同陳鍵鋒未拍《律》劇之前，佢已經住喺我樓上，我哋係住喺同一幢大厦，唔係同一間屋，報道出咗之後，我有同陳鍵鋒通過電話，大家都覺得好笑囉。」雖然惹起同居疑雲，但胡杏兒強調無意搬離其風水屋。
胡杏兒表示與圈外男朋友很夾，雙方給予彼此很大的自由度。她說：「兩個人一齊，最緊要係開心，唔開心就唔好喺埋一齊，呢啲就係我哋嘅相處之道，我個人好怕拉拉扯扯。」問到她現在是否已認定男友為下半生對象，她卻說：「我得二十三歲咋，我唔會咁講，唔係咪好核突。」
胡杏兒去年憑台慶劇《流金歲月》的智障角色而奪得無綫「我最喜愛的飛躍進步女藝員大獎」，而現正播放的《律政新人王》，其演出亦大獲好評，未知她是否覺得自己已經上位？胡杏兒即說：「當然希望咁諗啦，呢樣係推動力，但我未夠好，所以每一次拍戲吸取到的經驗，好嘅要keep住，唔好嘅就要改進。」
撰文：朱芷瑩 攝影：甄朝健 場地：Bamboo 服裝：Dada
