提起醫院管理局專業及公共事務總監高永文，大家係咪會即刻諗起佢俾大班鬧呢？真慘情！沙士爆發初期，成日露面嘅高永文，喺鏡頭前面成日愁眉苦臉。原來一提到佢嘅強項——駁骨，佢就成個人「生」晒！
本身係骨科專科醫生、幫過俾人斬傷嘅大班駁過骨嘅高永文，噚日應醫學博物館嘅邀請，出席骨科醫學展覽嘅開幕禮，可謂開正佢嗰瓣。平時一臉嚴肅、言詞謹慎嘅高永文一反常態，笑容滿面不單止，見到啲「久違了」嘅骨科手術用具，重滔滔不絕咁介紹，好似見番十幾二十年冇見嘅老朋友咁熱情。佢見到把剪綵用嘅鉸剪時，重衝動到講咗句：「見到鉸剪就想攞！」睇嚟高醫生真係好技癢噃。
原來高醫生已經成一、兩年冇做過大手術，只係幾個月前做過個小手術，唔怪得咁想重執手術刀啦。不過，佢以前做手術嘅臨床經驗都唔少㗎。佢話曾經有個病人，兩隻手腕都被斬甩咗，都係佢幫手駁番。佢重幫過唔少因為工業意外同暴力而被斬斷手指嘅人，重新「直豎拇指」㖭！
﹙圖﹚骨科醫生出身嘅高永文（左），一見到骨科手術用病床及用具，就滔滔不絕向人介紹，看來十分技癢哩。 張家俊攝
傳真︰2623-9278
電郵︰